(سینمایان و أییلمهین اینسانلارا ایتحاف)
کیمسه "اونو" ساتمیشدی کی، یازین ایلک گونلرینده، عطیرلی و سو پردهسیندن یارانان بیر کؤنول اوْخشایان هاوادا قامارلاندی...
گؤزلرینین اؤنونده قارا و اوُلو کؤلگهلر چاخناشیردیلار. آغیزیندا آجی بیر آغرینی سئزیردی.. اورهیی شیدتله چیرپینماغا باشلامیشدی. دامارلاریندا آخان قانلار دالغالانیردیلار. بدهنینین کئی اولماغین دوُیوردو. تؤوشمهیه دوشموشدو. درین و آغیر بیر بوشلوقدا گؤروردو اؤزونو.. قوْلاقلاریندا باغیرتی سسلری محو اولوردو...
ـ "دئیهجهیم.. هر نه ایستهسز.." ـ اؤز باغیرتیسیندان داشلاندی.
ایندی کامیل آییلمیشدی. اوتاغین اوْرتاسیندا ایدی، یاتاقدا.. نئچه لحظه حئیرانلیقلا اؤز اطرافینا باخدی. اوتاغین تاوانیندان قارانلیق یاغیردی.. آچیق پنجرهدن گوموش ساچاقلی آیی آختارماغا ترپندی. قارا بولودلار آیی بوغموشدولار.. اوتاغین درین سوکوتو سانجیردی قولاقلارین. یانیندا یاتان قادینا باخدی، اونون چیلغین باخیشلارینا...
ـ "یادیما گلمیر.. یادیما گلمیر نهلر دئمیشم.. هئچ یادیما گلمیر نهلر باشیما گتیردیلر.."
ـ "سن کی..." قادین بوغولتو سسله بیر زاد دئمک ایستهسهده:
ـ "دینمه.. بیر زاد دئمه" ـ اونون سؤزونو کسدی ـ "حتماً یئنه ایستیرسن دئیهسن چوخ فیکر ائلمه... اونلار اینسان یوخ حئیواندیلار.. هر زاد دوزهلجک.."
ـ "یوخ!.. بو دفعه باشقا بیر زاد دئمک ایستهییرهم.." ـ قادین توْتقون بیر سسله دئدی. ایچریسین یاندیران سؤزلری دیشاری تؤکمکدن اوتانیردی.. اوچ آی ایدی کی، اونون بو داورانیشینا اؤزون عادت وئره بیلمهمیشدی. او، گئجهلر مختلف وضعیتلرده یوخودان داشلانیردی.. قانتر ایچینده، حئیرانلیقدا.. سانکی درین هوشسوزلوکدن آییلیبدی. گاهدان دا اونو یئرینی باتیرمیش گؤروردو.
پنجرهدن أسن یئل پردهنی خیش ـ خیشا سالدی. هله درین بیر بوشلوقدا چابالاییردی. قادین ایسه درین بیر ناراحاتلیقدا، سوکوتدا. قادین اونون بو غیر عادی ایشلرینه نه سبب اولدوغونو دوشونموردو. باشینا نه گلدییینی اوندان سوروشاندا، درین بیر بوش اوُچورومدا تاپیردی اونو! قارانلیق بیر اوتاق.. بدهنینین هئچ بیر یئرینده یارا یا أزیلمه ایزی تاپمامیشدی. گاهدان دوشونوردو: "قورخودوبلار.. یادا.." بوردا قورخوردو.. "حتماً بئینینی یوْیوبلار" بو بارهده چوخ قورخولو زادلار ائشیتمیشدی.
یئنه درین بیر قارانلیق اوُچورومدا چابالاییردی... قادین سوکوتو پوزدو آخیردا:
ـ "یادیندا می بیر گون دئدین شعرلریمله میلّتیمیزین دوشمنلرینه اود یاغدیریرام؟.."
اوزونون رنگی اؤلولر کیمی ایدی. یئنه قان تر ایچینده ایدی. کئچن گئجهلر او آییلمامیشدی، قادین دوشونوردو یئنه هر زاد اول کی کیمی اولماقدادیر… آمما یئنه بو گئجه.. بیر باغیرتی ایله آییلمیشدی… قیز چاغیندان اونون شعرلرینی دیقّتله اوخویاردی. ائله اونو اونلا تانیش ائدهن دیلسیز آنجاق سؤزلو شعرلری ایدی. اوْ، شعرلرینده ایناملی و یوکسک روحلو بیر شاعیر کیمی یارانیردی...
ایندی ایسه قادین شعرلردن سؤز آچماقلا اونا اومید وئرمک ایستهییردی..
ـ "شعرلریم... شعرلریم... شعرلر.." بیر بومبا بئینینده پارتلادی. بدهنینه آیدین بیر تیترهتمه قوندو. سانکی بدهنینه برق یاپیشدیرمیشلار. تیترهدیکجه اوُچوروملار دوْلور، قارانلیقلار گئری چکیلیردیلر ذهنیندن.. آغ بیر اوتاق.. آجی بیر ایینه..
ـ "بوزلو بیر سو گتیر.. یانیرام.."
سسسیز آغلایان قادین نئچه لحظه اونا باخدی. اونون سسینده گیزلی بیر اینام دوُیدو. آیاغا دوردو سو گتیرسین... بوغازیندان ایچریآخان سو، ایچری آلووون سؤندوره ـ سؤندوره معدهسینه دولدو. هله ده یانغینلیق دویوردو. یئنه سو ایچدی.. پنجرهیه قونان بولودلار آیین اؤنوندن یاواش ـ یاواش گئری چکیلیردیلر.. یئنه أزبر اولدوغو تهلکهلی شعرلر ذهنینده ایدی.. ذهنینه قونان توزلار ایندی کامیلجه سیلینمیشدی...
آخشام اوستو ایدی. چالیشدیغی دوکانین قاپیسین باغلاییب، ائوه ساری گئدیردی.. یئنیجه چاپا وئردییی شعر کیتابی چوخلارینین مزاجینا اویغون دوشمهمیشدی. بیری تئلئفون دا دئمیشدی: "شعرلرینده چوخلو زادلارا ساتاشیرسان؛ بو شعرلر باشینی اودوزاجاق!" بو ایسه گولوب، یالنیزجا: "من شاعیرسم میلّتیمین سؤیلر دیلی اولمالییام" دئمیشدی...
ألینده کی سیغاری خیاوانین قورو آرخینا آتدی.. ماشین دالیجا ایدی، ائوه گئتمک اوچون... بیر آندا اؤنونده آغ بیر ماشین دایاندی. هله ألینی جیبیندن چیخارتمادان، بیر قوش کیمی یئردن قالخیب، اؤزونو ماشینین ایچینده گؤردو.. قوللاریندان سرت یاپیشان أللر، ترپنمه گوجونو آلمیشدیلار اوندان.. گؤزلرینه باغلانان قارا پارچا سانجیردی گؤزلرینی... گؤزلری آچیلاندا اؤزونو قفس کیمی بیر اوتاقدا گؤردو. قارا بیر اوستول اوسته باغلانمیشدی، أللریندن، قوللاریندان. نئچه لحظه اطرافینا باخدی. نئچه کؤلگهنی مات بیر شوشه آرخاسیندان سئچه بیلدی.. اطراف اوتاقلاردان گلن غیر عادی و وحشی باغیرتیلار سسی، قورخو سالمیشدی جانینا. اؤنوندهکی ماسا اوستوندن اوزونه شاخان کؤزهرمه لامپانین ایشیغی قاماشدیریردی گؤزلرینی. سول قولوناساری باخدی؛ قولونداکی ساعاتی ایشلمیردی… قیچلاری نئچه مدت ایدی قاشینماغا باشلامیشدی. او آندا حاضیر ایدی هر نهیین وئرسین، آنجاق بیر دفعه اؤزونو قاشیسین. دیزلری آلیشیردی. سانکی اود توتموشدولار اونلارا.. ایندی بدهنینین تامام یئرلری قاشینیردی. اطرافینداکی بوغولتولو و آنلاشیلماز سسلر اونو داها وحشته سالمیشدی. گؤزلرین وحشیجه شاخان لامپانین ایشیغی سؤکسهده، اونلاری آچیق ساخلاماغا جهد ائدیردی. اطرافیندا ویز ـ ویز سسلری اوجالیردی. درین بیر چیلغینلیقدا اؤزونو حیس ائدیردی… باشی اوسته بیرینی گؤردو. اوزو گؤرونموردو. باشی لامپانین ایشیغی آرخاسیندا قارانلیقدا ایدی. بیردن ساغ قولوندا آجی بیر آغرینی سئزدی: "ایندی قیفیللانمیش دیلیز آچیلار.. جهنم ایلییی آچاردیر.." نفسین دویدو اوزونده.. گؤزلری شوشه کیمی صاف و احساسسیز ایدی.
بیر گیزلین قورخو جانینا دولدو. سسی قوْرودو. نئچه لحظه سعی ائتدی اؤزونو ایتیرمهسین. لاکین دامارلاریندا قان یئرینه داغ قورغوشون دولانماسینی بیردن احساس ائتدی. أللری کئیلشیردی، بارماقلارین ترپتمهیه چالیشدی. ترپنتیلرین دوُیمادی. گؤزلرینین دریسی چکیلیردی، بیر کیمسه ماققاج ایله چکیردی سانکی.. دیشلری قیفیللاشدی. نفس چکمک اونا یاواش ـ یاواش چتینلشیردی. نه اوچون او وضعیته دوشدویوندن خبرسیز ایدی. اؤز ووقار و دورومون ساخلاماغا چالیشدی. سهند داغی گؤزو اؤنونده ایدی. بز قالاسی دوماندا؛ بابک آتلیلاری ایله محو اولوردو اوزاقدا… بیر قالین چن، داغی بورویوردو.. نئچه لحظه ایدی عادی حالدان چیخمیشدی.سوْدان دیشاری دوشموش بالیق کیمی یئر ـ گؤیه آتیلیردی. اوتاغین سرین هاواسیندا، هاواسیزلیقدان بوغولوردو. دریندن تؤوشویوردو، دالبادال. آغیر گلن نفسی، بوغازیندان خیریلتی سسله ائشییه چیخیردی... یاواش ـ یاواش اوزو قارالیردی... بوغازینی سیخیردی بیر کیمسه سانکی... گؤزلری حدقهدن ائشییه چیخمیشدی.. نئچه لحظه ایدی نفس چکمهیی دوُیولموردو...
قادین، اونون هر آن قیافهسینین دهییشمهسینی گؤرهنده آخیردا:
ـ "نه اولدو سنه؟!" ـ دئیه سوروشدو ـ "قورخوبسان می؟!"
باشین بوْلادی.
ـ "او لحظهلری بیر دفعه ده یاشاماق ایستهمیرم.. بیلمیرسن او آغ اوتاقدا هوشون باشینا گلنده، مین دفعه آرزو ائدیرسن.. آرزو ائدیرسن نه ایستهییرلر وئریم آنجاق منی بوْراخسینلار.. بیر دفعه ده او جهنم ایلییین تجربه ائتمهییم..."
ـ "هانسی.. آغ اوتاق... نه جهنمی؟!". تعجبله سوروشدو.
ـ "بوراخ!.. چوخ دهشتلی دیر.. دئیه بیلمهم.."
ـ "دؤیدولر می سنی؟"
ـ "کاش دؤیهردیلر.. باخ ایکی یول آیریمیندا قالمیشام.. بیلمیرهم نهائدهم؟.."
قادین گؤزلرینه باخدی. نئچه لحظه سوکوت یاری قارانلیق اوتاغا حاکیم اولدو.
ـ "من سنین شعرلرینه اینانیرام.. اونلاردا اولان معنالارا دا.. حتماً میلت ده سنه اینانیر.. بیر گون بو اؤلکه سنه گووهنهجک!."
ـ "بیلیرهم.. بیلیرهم نه ائدیم..."
ادبیات و اینجه صنعت مجلیسلرینده یئنی بیر کیتابدان سؤز ـ صحبت گئدیردی. هامی او کیتاب حاققیندا قیزغین بحثلر ائدیردی. اؤزهللیکله اونون بیر شعری حاققیندا اطرافلی بحثلر اولونوردو. هامی او شعری جسارتلی و تهلکهلی بیلیردی.. او شعرین آدی "جهنم ایلییی" ایدی.