اینام - یازان: حمید آرغیش

گون اورتادان بیر آز کئچمیشدی. دوستاقلی‌لار ناهارلارین تزه بیتیرمیشدیلر. یایین أن او ایستی گونلریندن بیری ایدی. هاوانین سیجاقلیغیندان بیر چوخ دوستاقلی‌لار بئحال حالدا تخت‌لری اوستونده اوزانمیشدیلار. ایکینجی بندین بئشینجی اوتاغی اولدوقجا ساکیت گؤرونوردو. اوتاغین بیر طرفینده اؤزـ اؤزونه میزیلدایان تئلویزییادان علاوه باشقا بیر سس اوتاغین سس‌سیزلیگینی پوزموردو..

"یاشار" تختیندن بیر آز قیمزاندی. اون ایکی  یاتاغین ساده‌جه یئددی تختی دولو ایدی. اوتاغین بیر ـ ایکی دوستاغی "مرخصی"یه گئتمیشدیلر. "یاشار" تختیندن آشاغی دوشدو. بند اولدوقجا ساکیت گؤرونوردو. "ایستی بو معتادلاری دا بتر حالدان سالیب" ـ دوشوندو. نئچه لحظه تئلویزییایا گؤز نیکدی. "پوسان تاجیری" دیزی‌سی اکراندا ایدی. نده‌نسه گولومسه‌ییب‌ باشین بولادی. تختی‌نین آلتیندان بیر ایستیکان چیخایب اوتاغین ساغ بوجاغیندا یئرلشن "فیلاکس"لارا طرف دؤندو. چایی ایچه‌رک بوگون سحر چاغی "ممد"له بحثه گیردییی موضوعونو خاطیرلادی...

گونشین ایستی شوعالاری دوستاغین کیچیک حیه‌طینده داها یاخیجی، داها یاندیریجی نظره گلیردی. حیه‌طین انی 10 – 11 مئتر و اوزوناسی 15 – 16 مئتر اولاردی. اطرافینی اوجا و تیکانلی مفتیل‌لر سارمیش حیه‌‌ط ده، ممد"دن باشقا کیمسه گؤرونموردو. او دووارین کؤلگه‌سینده دایانمیش، گؤزلری بلیرسیز بیر یئره تیکیلمیش و آسیلی قالمیشدی. یاشار حیه‌طه گیره‌جک اولان 4 تایلی قاپی‌نین سکی‌سی اوسته چؤمبه‌لدی. نئچه لحظه ممده گؤز تیکدی. باییردا، چؤلده چوخ قالدیقدان اونون اوزونون دریسی قومرال رنگه دؤنموشدو. نئچه لحظه اونا زیللندی... نهایت اوتوردوغو یئردن قالخدی؛

- «بایاقدان دوشونوره‌م بلکه بو قونو حاققیندا سنله هئچ دانیشمامالی ایدیم.. » -  دئدی. ممد هله بلیرسیز بیر یئره زیللنمیشدی. یاشار باشین تولایاراق سؤزونو داواملادی:

- «.. بعضی‌لرینه بوجور سؤزلر چوخ آنلامسیز نظره گلر.. وطن و ائل دردینی هر کیمسه آنلاییب داشییا بیلمز..»

ممد سورعتله اونا طرف دؤندو. نئچه لحظه اوزونه باخدی یاشارین.. سونرا الین چیینینه قویاراق دئدی:

- «یوخ قارداش.. یوخ.. من ده بو حاقسیزلیقلارلا اؤز ایچیمده قارشی _ قارشییا گلمیشدیم.. من ده بونو آنلامیشدیم کی بیزیمله مرکز ده یاشایان وطنداش دئییلن هر بیر کیمسه ایله چوخ فرقیمیز وار.. آما..»

دریندن آه چکیب، سؤزونون داوامینی بوراخدی.

- «آما بو شیدتله ، بو آچیقلیقلا قارشیلاشمامیشدین...بیری سنه دئمه میشدی کی سنین اؤز الین اؤز باشین اولا بیلر..مستقل بیر دؤولت اولا بیلرسن..» - یاشار دئدی. نئچه لحظه سوکوت حاکیم اولدو. ممد آلنیندان آخان تری سیله رک دئدی:

- «قاضی منی محاکمه ائده‌نده سوروشوردو سن نه اوچون سیلاح آلیبسان؟! اصلا سیلاحی نئیله‌ییردین؟ جاوازسیز سیلاحلا کیمی اؤلدورمک ایسته‌ییردین؟؟»

من ساده‌جه گولومسه‌ییردیم.. نه دئیه بیلردیم.. اؤ ایسته‌دییگی کیمی دونیایا باخماق ایسته‌ییردی.. دئدیم بیزیم کندیمیز سینیرا یاخیندیر.. اورادا کورد قاچاقچیلاری و کورد تروریست لری گلیب گئدیرلر.. داوارلاریمیزی زورلا آلیرلار.. اونلارا قارشی سیلاح آلمیشام..

 اما قاضی دئدی: - سن آرتش ایدین؟..

- دئدیم بیر دفعه یوخ 100 دفعه گلیب دئمیشیک. شیکایت ائله‌میشیک. بیزیم کندیمیزه گلیرلر.. تالاییرلار.. آنجاق هاراییمیزا گلن یوخ دور.. نه اوچون بیزیم داوارلاریمیزی تالایاندا «آرتشدن» کیمسه او اطرافدا یوخدور..

قاضی بونونلاری آلدیرمادان آخیردا بیر ایل حبس وئردی منه.. نه اوچون؟! نه گوناهین صاحیبی ایدیم؟ »

- « سن مالینی و خانواده‌نی مدافعه ائتمک اوچون آیاغا قالخدین. آما من... » یاشار دئدی.

سؤزون قورتارمادی..

_ «هئچ اؤیله دوشونمه.. بیزیمده ایچیمیزده وطن دویغوسو وار.. بیز ده تورپاغیمیزی سئویریک.. نه یازیق کی هارادان باشلادیغیمیزی بیلمیریک.. هله اؤز مالینی قورویانمایان وطنی نئجه قورویار.. ».

یاشار اونون اوزونه باخدی.

- «اؤزگه قوینوندا بؤیومک فخرگتیرمز.. اؤز الیمیز اؤز باشیمیز اولمالیدیر.. باخ ! بیزیم وطنین آدی ایندی دونیا خریطه سینده گؤرونمه سه ده آنجاق اولدوغونو بیلمه لی ییک.. اونا صاحیب چیخمالی‌ییق...»

ممد باشین ترپتدی. اونون سؤزلرین اوره یینده تصدیق ائدیردی. یاشار نئچه آن اوزونه باخدی. سونرا آیاغا قالخاراق ایره‌لی گلدی:

- «بورادا اونا اینامین اولسا او مطلق بیر گون اولاجاقدیر..یئتر کی بئیینله اوره‌کله اونا ایناناسان..» - دئییب گولومسه‌دی.