گونئی آذربایجان حئکایه ادبیاتی
حمید آرغیش - ین حئکایه و مقاله‌لری
گونئی آذربایجان حئکایه ادبیاتی
حمید آرغیش - ین حئکایه و مقالهلرییاغیشلی تصویر - حمید آرغیش
اوْتاغین ایشیغی یالنیز ماسا اوستونده اولان مطالعه لامپاسیندان ایدی. لامپادان سوزه‌ن ایشیقدا، اوتاغین اوچ طرفینده قفسه‌لنمیش نازیک ـ قالین کیتابلارین یالنیز قارالتی‌لاری گؤرونوردو.
ماسا آردیندا بیر صندل اوسته اوْتورموش و أللرینه سؤیکنمیش "آنار"ین اوزو، چیراقدان شاخان آلتون ساچاقلار قارشیسیندا ساریلیق توتوموش آداملار کیمی نظره گلیردی… گؤزلری اوتاغین ایکی تایلی پنجره‌سینه زیلله‌نمیشدی...
چوخدان ایدی ماسا اوستونده کی چای ایستیکانیندان بوغ حلقه‌لنمیردی.مطالعه لامپانین یانیندا نئچه بیر درجه‌لی مکتب اوچون درسلیک کیتاب گؤرونوردو.. اوتاغین سوکوتون ائشیکده قالخان بولودلارین شاققیلتی‌سی پوزدو. آنار اوْتاغین آغیر هاواسین دیشاری وئریب، باشی‌نین توکلرینی أللرینه سورتدو..
ـ "شام یئیه‌جک سن می؟."
اوتاغین ائشیییندن قالخدی او سس.. آغیزین آچیب بیر زاد دئمک ایسته‌دی؛ لاکین اوتاغین سوکوتو پوْزولمادی... باشین بوْلادی.. ائشیکده یاغیش شیره‌بوران یاغیردی...
اوتاغین چیراغین یاندیراندا قارانلیق مطالعه لامپاسی‌نین دؤوره‌سینده بوغولدو. آغیر ـ آغیر پنجره‌یه ساری دوغرو گئتدی. ائشییی گؤرمه‌یه زیلله‌ندی… یاغیشین ایری دوُمورجوقلاری شوشه اوستونده آشاغییا ساری آخیردیلار. اوتاغین چیراغی شوشه‌ده عکس ائدیلیردی..
عکیزین شوشه‌ده گؤردو... قیافه‌سین اؤیله پوزغون گؤرمه‌میشدی.. پنجره‌یه ده‌ین یاغمور دومورجوقلاری، شوشه‌یه منعکس اولونموش آنارین عکیزینده گؤزلریندن یاناقلارینا آخیردی، و اورادان أنگینه...
گؤزلرین سیلدی. لاکین شوشه‌ده سو آخیردی گؤزلریندن هله.. اوتاغین وسایط‌لری شوشه‌ده آیدین گؤرونوردو... کیتاب قفسه‌لری، 1325 ـ جی ایلی تداعی ائده‌ن ارک قالاسی اوسته ساواشلاردان چکدییی تابلو، اوتاغین تاوانیندان آسیلی اولان کؤزه‌رمه لامپا...
ایندی یاغیشین شوشه‌یه ده‌یمه‌سین داها گؤرموردو.. گؤزلری شوشه‌ده منعکس اولموش چیراغا زیلله‌نمیشدی...
سالوندا نئچه لحظه، قاپی آرخاسیندا سوْسقون دایاندی. کیلاسدان گلن اوشاقلارین گولوب ـ دانیشماق سسلرین دینله‌دی. هر زاددان آرتیق سئویردی او سسلری.
سینه‌سین قاباغا وئریب، قاپینی تیققیلداداندان سونرا ایچری گیردی. کیلاسین سس ـ کویو کسیلدی. اؤیره‌نجی‌لرین هامیسی آیاغا قالخدیلار. پنجره اؤنونده قرار تاپان ماسایا ساری آغیر ـ آغیر آددیملارکن، او آنداشاگیردلری ده گؤزده‌ن سوزدوردو. هله آیاق اوسته دورموشدولار شاگیردلر.. بیردن نئچه لحظه یئرینده دوردو. سانکی ایلدیریم ووُردو اونو.. بئینی قیزیشدی...
کیلاسین سول طرفینده آخیر صندل‌ده هئیکللی بیر اوغلان آیاغا دورمامیش، اؤیله ساکیت اوتورموشدو..
اونا زیلله‌ندی. قیافه‌سی سرت و زارافات‌سیز ایدی.
ـ "اوْتورون اوشاقلار!.." دئییب، ماساسی آرخاسینا کئچدی.. نئچه لحظه بویوندا مین بیر فیکیر بئینینه ووردو.. "نه اوچون او اوغلان آیاغا دورمادی؟!. هئیکلی اوچون اوموش؟.. بلکه‌ده کیلاسین قولدورودور... بلکه‌ده تزه گلدیییم اوچون منی سیناماق ایسته‌ییرلر.."
اوشاقلار پیچیلداشیردیلار.. نئچه لحظه اونا ساری باخدی. قیافه‌سی هله‌ده زارافات‌سیز ایدی..
ـ "یاخشی‌دیر اونلارا بیر آز بؤیوک‌لره حؤرمت ائتمک حاققیندا دانیشام.. اوندا او اوغلان ایشین آنلار.. یاخشی دئییل ایلک گونده و کیلاسین ایلک ساعاتیندا اونا أل قووزایام.. اوندا منیم یانیمدا آچیلیشمازلار.."
و او ساعاتی اؤزوده بیلمه‌دی نه جور سوردو.
پنجره‌یه منعکس اولموش اوتاغین لامپاسی تار گؤرونوردو ایندی.. پنجره‌نین شوشه‌سی سیس‌لنمیشدی. هاوا هله چیله‌ییردی... ائشیک داها آیدین گؤرونموردو..
گئری دؤندو.. ماسانین اوستونده‌کی ایستیکانا گؤزو ساتاشارکن اوره‌یی‌نین یانماسین دویدو. سورعتله ماسایا ساری آددیملادی. ألی ایستیکانین گؤوده‌سینه توخوناندا اونو نئچه مدت اؤنجه قادینی گتیردییینی خاطیرلادی. نئچه لحظه ساکیت دوردو. بیر زاد آردیجا ایدی سانکی.. پنجره‌یه بیر آنلیق ایشیق قوندو.. گؤی گورولتوسو قالخارکن دیکسینیب اؤزونه گلدی. ألینی قولاقلارینا باسدی... "آغا ایجازه.." بیر سس قولاقلاریندا پارتلادی...
ـ "یوخ!.. یوخ!.. من تله‌سدیم.. باغیشلا منی.." ـ اوُجادان باغیردی.
اوتاغین آغیر سوکوتو قوْلاقلارینا دولاندا پنجره‌یه ساری یئریدی… نفسی آغیر گلیردی سینه‌سیندن… پنجره‌نین سیس‌لی شوشه‌سین ألی ایله سیلدیکجه اوتاغین وسایط‌لری بیر تابلو کیمی جانلانیردیلار..
"یئنه آیاغا دوُرمایاجاق می؟! بو دفعه قالخمازسا دؤردونجو دفعه‌دیر!.. کیلاسین سون ساعاتی‌دیر.. آللاه ائله‌سین قالخسین.."
بو فیکیرلرله کیلاسا داخیل اولدو. ایچری گیره‌رکن، کیلاسین سون ردیفینه ـ او اوغلانین صندلینه ـ زیلله‌ندی. اطرافینداکیلار آیاغا دوُرموشدولار.. آمما او یئنه سرت قیافه‌سیله اؤیله اوتورموشدو.
اوغلانین اوزونه گؤز تیکدی. لاکین اونو اعتناسیز گؤردو.. بئله نظرینه گلدی کی بونا گولور.. گؤزلری قان چاناغینا چؤندو. بیر پینار بئینینده قاینادی..
هله شاگیرلر آیاق اوسته دورموشدولار. اونلار دا معلیم‌لری‌نین نئچه آندا قیافه‌سی ده‌ییشمه‌سینی سئزمیشدیلر.
سورعتله اوغلانا ساری آددیملادی. اوغلانین اوزونه ده‌ین سیلله‌نین سسی، فیکیرلری آیری یئرده اولان شاگیردلری ده او طرفه یؤنه‌تدی..
ـ "سنین دوشونجه‌ن یوخدور مو هئچ؟.. سنه دئمه‌ییب‌لر تکجه معلیم یوخ، بلکه اؤزوندن بؤیوک هر بیر کیمسه بیر یئره داخیل اولاندا اونون آیاغینا دوراسان.. آدام گره‌ک چولاق اولا کی معلیمی‌نین آیاغینا قالخمایا.. یوخسا هئیکللی بده‌نن گووه‌نیرسن؟.." ـ معلیم اوجادان باغیردی..
ایندی‌یه‌جن هئچ زامان بیر اؤیره‌نجی‌له بؤیله داورانمامیشدی. قان چاناغینا دؤنموش گؤزلرینی اونون اوزوندن چکمیردی... ایلان تک اؤز اووون اوْوسونلاماق ایسته‌ییردی..
ـ "آغا ایجازه!.. بیزیم ایکی قیچیمیزدا چولاقدیر آخی!.."
احتراملا دولو بیر سسله، اوغلان یاواش دئدی...
ایلدیریم شیدتله شاخدی... گؤی گورولدادی. یاغیش شیدیرغی یاغیردی، سانکی آنار"ین گؤز یاشی ایله ایسلانمیش بیر تصویری یوْماق ایسته‌ییردی...
سون - یاز 78
=====================================
و سنین حئکایه‌لریم... کیتابندان
سلام سایین حمید آرغیش
من بو حیکایه‌نی اؤنجه ده اوخوموشدوم، یئنه ده اوخودوم...حتی بیر داها دا اوخودوم. آنجاق هر دفعه‌سینده ده سونونا یئتیشنده توکلریم بیز- بیز دوردو، اوره‌ییمین ایچی اویولدو.
الینیزه- قلمینیزه ساغلیق. چوخ ائتگیله‌ییجی قلمینیز وار. یاشایین سیزی!
سلام دوست خوبم
وب قشنگی داری
خوشحال میشم به وب من هم سر بزنی
میتونی برای وبلاگت آدرس جدید ثبت کنی
http://s2a.ir