X
تبلیغات
رایتل

گونئی آذربایجان حئکایه ادبیاتی

حمید آرغیش - ین حئکایه و مقاله‌لری

پلمه لی سحر

          ایره‌لی‌دن اوزونه چارپان سازاغین قارشیسیندان قاچماق اوچون، باشینی آشاغی سالیب، گؤزلرینی یئل‌قوْوانین اؤن تکه‌رینه سانجانان قیزیل گوللرینه زیلله‌میشدین.. قایناغی بللی اولمایان بیر کؤنول اوخشایان گول قوخوسو بورونونو تومارلاییردی. خیاوانین اورتاسینا چکیلمیش آغ قالین جیزگی، نارین ـ نارین سپه‌لنمکده اولان اینجه پامبیق کیمی ایشیلدایان قارین دنه‌لری آلتیندا ایتمیش ایدی. گئجه‌دنیاغماغا باشلایان و آغ اؤرتویونو هر یانا دؤشه‌مکده اولان قارین اوجالیغی توْپوغاجان چاتاردی. 

 


  هله گول قوخوسوندان سرمست ایکن، بیر یئل‌قووانین ساغ طرفینده سنله برابر اوْلمایا گوجه‌نمه‌سینی دوُیورسان. آراسی سنله یاریم مئتر اولاردی. اونون یئل‌قووانینین تکرلری قار اوسته ایز سالمادان فیرلانیر، ایره‌لی گؤتوروردو اونو. تعجب‌لنیرسن، حدسیز.. یوخودا اولدوغونو سانیرسان، لاکین او گئرچک بیر چارخ اوسته ایدی...

باشینی قالدیریب اونون کیم اولدوغونو بیلمه‌یه ماراقلانیرسان. آیاقلاری سورعتله چارخین آیاق آلتلارینی دولاندیریر. آغ آیاق‌قابی‌لاری، قارا شالواری، قارا مانتوسو.. بیر آن نفس آلمایی اونودورسان. درین بیر حیرته دالیرسان. باخیشلارینی آیاقلاریندان اوسته ساری چکیرسن. اوره‌یین شیدتله چیرپینیر. قارین نارین دنه‌لری چارخین تکه‌رلری آلتیندان اطرافا سپیلیردی.

اوزونو یاخشی سئیر ائده بیلمیرسن. ماوی بیر شال آلتیندان یالنیز شوه گؤزلری گولوردو سنه. گؤزلرینین ببه‌کلریندن آی ایشیغی فیشقیریر. سازاق آزجا شالی اوزوندن کنارا چکنده یاناقلارینی آللانمیش گؤرورسن. نازیک دوداقلاری کناریندا گولوش خیمه وورموشدو. چارخدان آشاغی دوشمه‌مزلی‌ین گوجه‌نیرسن. نئچه آن درین بیر بوشلوقدا سئیر ائدیرسن.

ـ «چاشما! منی سئومه‌ییردین می مگر؟!». سؤزو ایله دیلین قیفیللاشیر. کلمه‌لر بوْغازیندا قوُرویور. قان تر ایچریسینده سن. سورغوسونا جاواب آلماییر او.. ساکیت گولوشونه حئیران‌سان. آلنی اوسته تؤکولموش نئچه قارا ساچینی کنارا چکیب:

ـ «یاریشاق!؟» ـ دئییر.

سنین جاوابینی آلمایا دایانمیر. دیلینین توتولماسینی بیلمیش ایدی سانکی. یاواش ـ یاواش چارخی سندن اوزاقلاشیر.. بیر آن باشین گئری چئویریب سنه قاشین اوینادیر..

تکه‌رلر آلتیندا غیژ ـ غیژ قارین ازیلمه‌سینی دویورسان.. یام ـ یاشیل بیر چمن‌لیکده اونا چاتیرسان. گونش سمانین اورتاسیندا آسیلی قالیب‌. الی الینده‌کن ایره‌لی گئدیرسیز سونو اوفوقه‌جن اوزانان یاشیل‌لیقدا، بولود کیمی نازلی. آغ قانادلی ایکی کپه‌نک کناریزدان کئچیرلر، بیر بیرلرین قوْوا ـ قوْوا.. ساری رنگلی کؤینه‌ییندن اونا هدیه وئردییین عطرین مدهوش ائدیجی قوخوسو قالخیر، کؤوشنی بورویوردو.

ـ «لیلام!».

گولومسه‌ییر اوزونه.

ـ «سونو چوخ غملی‌دیر مجنونون..» ـ دئییر ـ «او داستانی خاطیرلایاندا، مجنونون طالعینه قایغی‌لانارام».

ـ «اصیل سئوگی‌لرین سونو بئله یازیلیب ازلدن.. ». سوسورسان نئچه لحظه.. «اوماریم کی بیزیم طالعیمیز بئله اولماسین..».

ایره‌لی‌دن گلن ایلیق یئل ساچلاری آراسیندا دولاشیر. بیر آنا یام ـ یاشیل تارلادا قاچماق اوچون الیندن چکیر. اوزونه باخیرسان.. گیزلی بیر سئوینج اوزونده پؤهره‌لنمیشدی. پاریلداماقدا اولان گؤزلرینده بیر صاف دنیزی بولورسان..

 ـ «یاخین گله‌جکده دونیانی سئیر ائده‌جه‌ییک..».

ـ «ال ـ اله، گؤز ـ گؤزه»؛ دئییرسن.

اوفوقه ساری قاچیردیز یوْرولما بیلمه‌دن.. تارلانین هر طرفیندن «خان»‌ین ” آی قشنگ جئیران“ ماهنیسی قولاقلاری تومارلاییردی. داها آراز قیراغیندا سیلاحلی عسکرلر یوخ ایدی. هر ایکی ساحیلده بیر تور بایراق آسیلی ایدی..

پلمه‌لی بیر هاوادا دؤرد دوواری کیتابلارلا تیکیلمیش بیر محوطه‌نین اورتاسینداسان.. آغ بیر گؤیرچینی بوغازیندان آسمیشدیلار تاواندان.. بیر طرفده باشینین آغارمیش ساچلاری بئلی‌نین اورتاسیناجان چاتان قوجا بیر کیشی یورولماق بیلمه‌دن بیر چالانی درینله‌دیردی. کناریندا بیر آرابا اوسته نئچه کؤهنه باشماق و کؤینه‌ک گؤرونوردو. باشماق‌لارینی بیر جوتو چوخ تانیش گلیردی گؤزونه.. سانکی ائله دونن اونلاری آلمیش ایدین. قوجا سنی سایمادان چالانی درینله‌دیر، یاواش ـ یاواش گیزله‌نیردی او چالادا.

کیتابلاردان تیکیلمیش دووارلاردا بیر کیتاب آراییرسان آدین، شکلین بیلمه‌دن..

قارالماقدا اولان سمانین بده‌نینی ایلدیریم قیلینجلاییر. گؤی باغیریر. سانکی آجیمیشدی جانی.. دامارلاریندا قان یئرینه بوزلو سو دولانیر.. اورادان قاچماق ایسته‌ییرسن، هاچان و نئجه گلدیگینی خاطیرلامیرسان هئچ.. کیتابلاری آشیرماق اوچون گوج وئریرسن دووارا. دوواردان آشاغی آشان ایلک کیتاب «حیات» ایدی. الینی دیشاری اوزاداندا بولودلارا توخونور.. باشقا کیتابلاری یئره سالیرسان.. «دوستلار»، «اینام»، «سئوگی‌سیز سئودالار..» و...

ـ «بیتدی»!.

گئری دؤنورسن.. قاچماغا ایمکان واریندی. چالانی قورتارمیش کیمی گلیردی قوجا.. الی بؤیرونده چالانین کناریندا دورموش، آجی بیر گولوش دوداقلاریندا یووا سالمیشدی.

ـ «اونون قبری حاضیردیر..».

سسینده اؤتکم‌لیک دویولوردو.. بارماغی ایله چالا یانینداکی بیر تابوتو گؤستردی.. نه‌دن او تابوتو گؤرمه‌میشدین بایاقدان.. تعجب‌لنیرسن..

ـ «باش داشیندا نه یازاجاقسان؟» سورور. «سانیرام ”لیلام“ یاخشی دیر..».

قوجایا ساری یورویورسن.. اللرینی اونون بوغازینا ساری اوزالدیرسان. لاکین اونا چاتمادان نه‌دن تابوتون قیراغیندا یئره دوشورسن. او سنی آلدیرمادان تابوتون قاپیسینی آچیر... اوشویورسن.. یاغموردا آغاجا آسدیغین ژاکئت یادینا دوشور. بیر آن اؤزونو اؤلموش سانیرسان.. قوجانین اللری اوسته لیلان قبره ساری گئدیردی.. سیچراییرسان یئریندن. هله اونون بده‌نیندن اونا هدیه وئردیین عطرین قوخوسونو دویا بیلیرسن.

ـ «یوخ!.. اونو گؤممه‌مه‌لی‌سن..»؛ باغیراراق اونو قولوندان توتورسان.. «یوخ.. لیلام..»؛ باغیریرسان.. قوجا سنه ساری دؤنور.. آجی بیر گولوش دوداقلاریندا پؤهره‌لنیب. گؤزلریندن اود شاخیر.. بیر زاد توخوندو اوزونه سانکی.. یانمیش ات قوخوسو بورنونا ایشله‌ییر. قولونو اؤتورمه‌میشدین هله..  آلیشمیش اللریندن بده‌نینه دولوردو اود.. باشین اوسته روحون دورموش، یاواش باشینی بولایاراق بو چکیش ـ برکیشی تاماشا ائدیردی. لیلان چالایا دوشور، بیر گوپپولتو سس ایله. قوجا بئله ساری گئدیر. اونو دایاندیرماغا گوجون قالماییب.. بده‌نین تیکه ـ تیکه یانیب تؤکولوردو. وار گوجونو ییغیب قوجانین اوستونه شیغاییرسان.. الینده‌کی بئله گؤیه قالدیریر. سانکی بیر ایلانی وورماق ایسته‌ییردی.. روحون باغیریر.. قافانا مؤحکم بیر زاد ده‌ییر. گؤزلریندن اود شاخیر...

آنانین سسینی ائشیدیرسن او آن:

ـ « اؤتور قولومو گؤروم.. لیلا کیمدیر.. ساعات سککیز دیر.. بو گون ایشه گئتمه‌یه‌جکسن؟!».

  27 / 6 / 83

گؤنده‌رمه تارریخی: یکشنبه 31 اردیبهشت‌ماه سال 1396 ساعات 05:59 ب.ظ یازار: حمید | چاپ مطلب
نظرات (0)
برای نمایش آواتار خود در این وبلاگ در سایت Gravatar.com ثبت نام کنید. (راهنما)
نام :
پست الکترونیک :
وب/وبلاگ :
ایمیل شما بعد از ثبت نمایش داده نخواهد شد