خرداد - حمید آرغیش

ـ اللریزی دولون ایره لی گلین!...

دئییب، اوزومه باخدی.

ـ اؤزونو اوخودما.. ـ رسول دئدی ـ نورمال اولاراق داوران.. سانکی هئچ بیر شئی یوخ کیمی.. باشقا بیر زادا فیکیر وئر..

اللر، یومروق اولاراق ایره‌لی گلدی.. سککیز ال ـ سککیز یومروق..

 پیلله‌لری آستا ـ آستا چیخیب، اوتاغا گیردیم. «یاشار» دیز اوستو بیلگی سایاری قاباغیندا اوزانمیش، اونون مانیتورونا گؤز تیکمیشدی. درین بیر فیکیرده ایدی. منیم اوتاغا گیردیییمی هئچ دویمامیشدی.

نئچه لحظه اونا باخدیم. گولومسه‌ییب، الیمده‌ کی تفسینی یئره قویدوم. بیر آن مانیتوردان گؤز چکیب منه باخدی.. ائلئکتریک دولچانین چایی دوشونوردوم ایندی تام دم آلمیش اولمالیدیر. ایستیکانلارا چای سوزه‌رک :

ـ بیر یئره چاتدین می؟ ـ دئیه سورو وئردیم.

یئریندن آزجا قیمزاندی. ساغ ال ایله باشین قاشییاراق :

ـ دوشونورم بو قده‌ر یاخشی اولوب ائله.. ـ دئدی ـ  کسرلی جمله‌لر، یومشاق چاغیریش..

کامیلجه قاوزانیب اوتوردو.. اوزونه باخدیم. گؤزلری‌نین آلتی قیزارمیشدی.

ـ بیر کره ده سن اوخو ـ دئدی ـ بیلیره‌م دون آخشامدان دفعه‌لرجه اوخوموسان.. سون کز اولاراق بیر ده باخ.. گؤزدن قاچان بیر زاد اولماسین. بورادان گئدیب ایشی بیتیرمه‌لی‌یم..

منه طرف ایته‌لدییی بیلگی سایاری دیزلریم اوسته قویدوم. بیر صحیفه‌لیک یازینی دون آخشامدان دفعه‌لرجه اوخودوغوم اوچون تام ازبرلمیشدیم، ایستمه‌دن..

«خرداد آیی» و «بیر خرداد» گونو حادیثه‌لری چوخ گؤزه‌ل شکیلده او نئچه سطیرلیک یازیدا ایشله‌نمیشدی.

یاشار اؤزونه بیر جیغارا آلیشدیرمیشدی. ماراقلا جیغارانی سوموروردو. توستوسونو حلقه‌لندیره‌رک آچیق پنجره‌دن دیشاری پوفله‌ییردی...

اونیوئرسیته‌ده اونلا تانیشمیشدیم. دوشونجه‌لی و دولغون بیریسی ایدی. چوخ چکمه‌دن صمیمی و قیریلماز بیر دوستلوغا ایمضاء آتدیق ایکیمیزده.. فیکیرداش اولدوغوموز اوچون دوستلوغوموز داها درین و قیریلماز کیمی ایدی.. اونیوئرسیته‌ده کی بیر چوخ مدنی و کولتوره‌ل ایشلری بیرلیکده قورموشدوق...

الین سول الیمین اوستونه قویموشدو. اوزومه باخیردی.. قومرال ایدی گؤزلری‌نین رنگی.. گؤزلریمی قاچیتمادیم گؤزلریندن.. کیمسه‌نین گؤزلرینه دالمایی باجارمامیشدیم هیچ زامان.. گولومسه‌دی:

ـ بو نه؟!

ـ سن نه دئسن او.. ـ دئدیم.

دوستلاریما باخدیم.. سککیز یومروغون دؤردو یوخ ایدی. ساده‌جه من و رسول قالمیشدیق.

یئنه سوردو:

ـ بو نه؟!..

یاشار ممدی ده تاپیب گتیرمیشدی. خیاواندا آددیم‌لاییردیق. آخشام چاغی اولسادا هاوانین ایستی‌لیییندن هئچ آزالمامیشدی.

«بوغدا مئیدانی»نین اؤنوندن بیر دفعه ده «محله خیاوانی»نا گئری دؤندوک.. یاشار ایکیمیزین اورتاسیندا آددیم‌لاییردی، من ایسه یاشارین ساغ طرفینده..

ـ «کاغیذلار حاضیردیر» ـ یاشار دئدی ـ «بو گوندن دوز 5 گون قالیر آیین بیرینه.. بو نئچه گونده، هر گون شهرین بیر طرفینده بیلدیریلری یایاجاییق..»

ـ «هامان سایدا؟!» ـ دئدیم.

یاشار گولومسه‌یه‌رک:

ـ «او قده‌ر وار کی، شهرین دووارلارینی اؤرته بیلسین..» دئدی.

نئچه لحظه ساکیتجه آددیملادیق. شهرین مرکزینه یاخین‌لاشدیقجا پییادا یول قالابالیقلاشیردی.. شهرین ان قالابالیق خیاوانی ایدی بو «محله خیاوانی».. توپلانتی یئری ایسه بیلدیری‌ده همین خیاوان وئریلمیشدی.

ـ بو گون آخشام من و ایکی باشقا اؤیره‌نجی شهرین آشاغی طرفیندن باشلایاجاییق» ـ ممد دئدی. او اولدوقجا آز دانیشان بیری ایدی. اونلا دا اومیوئرسیته‌ده تانیش اولموشدوم. ایتی و دولغون قلم صاحیبی دیر. اونیوئرسیته‌نین ایکینجی تئرمینی تاماملاماقدادیر.

ـ «بو ایش اولدوقجا خطرلی دیر!» ـ دئدیم ـ «بیلیرسیز بیر خرداد حادیثه‌لرینی و او گون جانلارینی وئره‌ن اینسانلارین خاطیرینی عزیزلمک هامییا واجیب‌دیر. آنجاق عینی حالدا اؤزوموزو ده قورومالی‌ییق. بو اؤلکه ده آذربایجانی دریندن دوشونن و اونا خاطیر یاشایان اینسان آزدیر. دوزدور هامی یاشادیغی وطنی سئویر آنجاق اونون دردینی بیلن آز اینسانلار وار. بو اوزدن بیلدیریلرین متنی ساده‌جه بیر توپلانتی خبری دیر...»

ساکیتجه دینله‌ییردیلر. آددیملایاراق شهرین مرکزینه چاتمیشدیق. «ماکی» خیاوانینا طرف دؤندوک. نئچه لحظه ساکیتجه آددملادیق. بللب ایدی هره‌نین فکیرینده بیر فیکیرلشمه‌یه موضوع یارانیب...

ـ «آللاه ائلمه‌میش توتولساق!؟..» ـ ممد دئدی.

ـ «بو ایش اولمامالیدیر..» ـ یاشار دئدی ـ «آنجاق هر ایشین بیر بدلی ده واردیر. بو ایشین ده هزینه‌سی توتولماق دیر. لاکین سانمیرام چوخ آغیر جزا وئره‌لر..». یاشار سون سؤزونو گولومسه‌یه‌رک دئدی.

ـ « آنجاق احتیاطلی اولمالی‌ییق.. سیز ده اؤزونوزو قوروماق، هرزاددان کره‌کلی‌دیر». دئدیم.

ـ سن دایان هله.. ـ دئدی.

مندن گؤزون چکیب ساغ طرفیمده اولان رسولا باخدی. یومروقلاری منیم کیمی قاباقدا ایدی. اونون یومروقلارین، اللری ایچینه آلدی. آغیر ـ یونگول ائتمک اوچون ترپتدی اونلاری..

ـ «هله بیر ایستیکان چای تؤکون ایچک!» ـ دئدیم  ـ «بوراد چوخ ال وئریشلی زاد ائله چای دیر...»

منه طرف دؤندو:

ـ «سن ده بیر زاد وار..»‌ ـ دئدی ـ «سندن آلاجایام..».

گؤزلریمه باخدی.. گولومسه‌دیم.

ـ اؤزونو اوخودما.. ـ رسول دئدی ـ نورمال اولاراق داوران...

ساغ الیمدن توتدو.. گؤزلرین گؤزلریمه تیکدی. سانکی گؤزلریمده آختاردیغینی اوخویوردو..

ـ «سون ال دیر.. قورتاریرام..» ـ دئدی.

دریندن تؤوشه‌دی. الیمی بوراخدی. ساغ الین قالدیردی. سورعتله الین سول الیمین اوستونه قویاراق دئدی:

ـ «بو دا بوش!!»

الیمی آچدیم. بوش دئییلدی.

ـ «گول دور..». رسول دئدی.

نئچه لحظه سوکوت حاکیم اولدو. گولومسه‌دیم. «گول ـ گول» اویونو بیتمیشدی. او آندا سالوندا اولان «بلندگو»نون سسی قالخدی. «ساییم اوچون دوستاغین حیه‌طینه گئدین.. ساییم اوچون دوستاغین حیه‌طینه گئدین..!!».

خوی دوستاغی

یای 87