X
تبلیغات
رایتل

گونئی آذربایجان حئکایه ادبیاتی

حمید آرغیش - ین حئکایه و مقاله‌لری

اورماندا آچیلان اوفوق - حمید آرغیش

جمعه آخشامی دیر. بو گونو ایللردیر سئویرم. اؤزگورلویه چیخان تکجه گونوموز..

بیر زامان جیغیر اولان یول ایندی گئنیشله‌نیب. کندلی‌لرین دئدییینه گؤره بو یاخین‌لاردا اورانی آسفالت دا ائده‌جک‌لر. او آن اورادا دایانماق بلکه منیم قراریم ایدی. داها دوغروسو چوخ دا امین دئییلم. سانیرام «قرار» آدلی بیر زاد اولمامالی ایدی. او قده‌ر ده بونا امین دئییلم. مسئولیت داشییان من ایدیم. او آن قطعیتله «من» اولدوغومو دئییه بیلیردیمسه، آنجاق ایندی دئیه بیله‌م. من هئچ زامان قرار وئرمه‌دیم. بلکه او قرار بیزه سونولدو یا گره‌کلی اولدو... آرخاسینا بیر زامان دالدالانیب جان وئردییم آغاج ایندی قوپ ـ قورو.. هله گوللـه ایزلرینی یارالی گؤوده‌سینده گؤره بیلیره‌م. دره‌جیک اولدوغو کیمی دیر. آنجاق او زامان قار چوخ ایدی. اوشویوره‌م..

 

 

ساعاتلار ایدی دوشه - قالخا یول گلیردیلر. یورغون آیاقلار، آغیر و یارالی بده‌نلری داشیمایا طاقت‌سیز... هاوانین دونداریجی سازاق و سویوغو دیزلرینه‌جن سویا باتانلاری یاواش - یاواش دونموش تورپاق اوسته سورونمه‌یه سوروکله‌ییردی. کمر و دؤشلری اوستوندن ساریلمیش بوش فشنگ قاتارلاری، اوزون توفنگلری ایله بیرگه اونلارلا سورونوردولر. دان یئری تزه‌جه سؤکولموشدو، آنجاق هاوانین قارانلیغی کامیلجه چکیلمه‌میشدی.

«توغرول» نئچه آددیم آرخادا گلیردی. بورخولموش قیچی‌نی زوران چکیردی. او اولدوقجا هامیدان آغیر آغرینی دؤزمه‌یه مجبور ایدی. آغیزلاردان گؤیه پوسگورولن بوغلار بورام - بورام گؤیه قالخیردی. اونون آرخاسیجا «آیدین» گلیردی. قروپون گئری گؤزه‌تچیسی کیمی چالیشیردی. الینده‌کی سیلاحینی سیخ توتموش، هرده‌ن گئری‌یه باخیردی. «ایبی» قروپون باشچیسی ایدی. آنجاق بو آغیر وضعیتده بیر ایشی گؤرمه‌دن منه مصلحت ائدیردی. چیینیندن توتموش قورشون سومویونو داغیتمیشدی.. کیچیک تپه‌جیکدن آشیب، آچیق بیر محوطه‌یه گیردیلر. اؤزومو گؤرورم. قروپون دئمک أن ساغلام آدامی دیر. صاف و  مانع‌سیز او محوطه‌ده دینجه‌لمک امرینی وئردی «ایبی». من ده یورغون ایدیم. او آن چوخ سئویندیم.

ـ «بیر آز بورادا دینجه‌لین!. سانیرام آرخامیزجا گلسه‌لر بو تئزلیکده بیزه چاتمایاجاقلار.. ».

«حیدر» و «غلام» یئره سریلدیلر. «ایبی» اونلارا ساری گئده‌رک آیدینا ساری دؤندو:

ـ «او تپه‌جییین اوستونده اول! آرخادان وورولماغی هئچ زامان ایستمه‌زدیم».

الی ایله آشاغی ائندیکلری تپه‌نی گؤستردی. توغرول بورخولموش قیچی ایله الـله‌شیردی. تیتره‌ین اللریله باشماغینی چیخارتماغا گوجه‌نمیشدی. اونو اسکیدن تانیردیم. هامیدان آرتیق اونا گووه‌نیردیم. کناریندا اوتورور، دئییره‌م:

ـ « چوخ آجی‌ییر؟!»

باشماغینی چیخاردا ـ چیخاردا دئییر:

ـ «کاش پاییم بو اولاردی.. نه یازیق کی بو اولمایاجاق..»

آیاغینا الیمی چکیره‌م. گؤینه‌ییر.

ـ «بیر آز دینجه‌لسن آغریسی گئده‌ر..». دئیه‌نده تکجه اوزومه گولومسه‌ییر..

ـ «بیر اود یاندیرالیم!» - آیدین"ین سسی دیر.

ـ «بورادا قورو اودون تاپیلار می؟» - غلام دئیه‌رک، گولومسه‌ییر.

ـ «لعنت اولسون بو تهران مزدورلارینا!.. ائویمیزدن اولدوق.. ایندی بو سویوقدا قاردا بیلمیره‌م هئچ اوغلوم هارادادیر..»

آیدین همیشه صبرسیز، و سینیرلی ایدی. بو آندا اونو حاقلی گؤرورم.

ـ «سئچدیین یولدان پئشمان‌می‌سان؟» ایبی دئییر.

ـ «سؤز بو دئییل! سؤز بو گون باش وئردییی حادثه‌دن سونرانین دیر.. بیز او ساخلوودا 12 کیشی ایدیک. آنجاق ایندی 5 نفر اولموشوق.. شهره چاتینجا کیم بیلیر نئچه نفر اولاجاییق؟.» یئریندن باغیریر.

نئچه لحظه سوکوت حاکیم اولدو. ایبی بیردن دئدی:

ـ «من ایناندیغیما دایانارام. بو دؤیوشون سونوناجان گئتمه‌لی‌یم..»

اوزاقلاردا نئچه پارتلامانین سسی بوغوق - بوغوق قولاغا چاتیردی. سانیرام قوردوغوموز دوزاقلار پارتلاییردی.

ـ «گئتسه‌ک یاخشی اولور.. بورالاری کیمسه تانیرمی». آیدین تپه‌دن آشاغی ائنمیشدی.

کیمسه اونون جاوابینی وئرمه‌دی.

ـ «سانیرام گئجه یولو آزمیش اولمالی‌ییق..» آیدین اؤز سوالینا جاواب وئردی.

ـ «هاوا ایشیقلانیر.. اوزبه اوزده بیر مئشه‌لیک گؤرونور.. بو مئشه‌لیکده پناه توتوب، خبر آلاناجان اورادا قالا بیله‌ریک.. ». ایبی دئدی.

ایبی قروپون ان یاشلی آدامی ایدی. اؤز ووقارینی سیندیرماسین دئیه یاراسیندان اینله‌میردی. اوندان سؤز آچماق دا ایسته‌میردی. بده‌نی‌نین بیر طرفی کئی اولموشدو. یاراسی اوسته باغلانان دستمالدان قان قطره - قطره دامیردی. گوللـه‌نین بده‌نینده قالمادیغینی دوشونوردو..

اورمانلیغا ساری یئریدیلر. اؤزومه باخیرام. توغرول"ون قولتوغوندان توتموشام. آستا ـ آستا ایره‌لی گئدیرلر. بوینوندان آسیلی اولان توفنگ ساغ ـ سولا تاولانیر..

مئشه‌لیک درین سوکوت ایچینده غرق اولوب. نئچه لحظه آغاجلار آراسینا باخیریق. یالنیز بیزیم آیاق ایزلریمیز گلیر آردیمیزجا...

ایندی مئشه‌لییه باخیرام. اولکی زاماندان داها فرقلی دیر. بیر چوخ آغاجلاری بالتالاییب‌لار. دئیه‌سن بیری هله اورمانلیغین او طرفینده بالتا چالیر. اونا ساری گئدیرم. بیر آندا کناریندایام. اورتا یاشلی بیری دیر. بیز بورایا ایلک دفعه گلن زامان او 4 ـ 5 یاشیندا اولمالی ایدی. بیر آن ایشدن ال چکیر. سویوقدان قیزارمیش اللرینی آغزینا طرف آپارییر. نئچه دفعه ایستی نفسینی اللری آراسینا پوفله‌ییر.. کیملیی بللی اولمایان بیر حئیوان آغاجلار آراسیندا قاچیر. نئچه لحظه سسه ساری باخیریق. سورعتله آغاجلارین باشیندان دا یوخاری قاوزانیرام. بیر قورد اورمانین دیگر طرفینه قاچیردی، آغزیندا بیر زاد دیشلری اراسیندا توتاراق... اوغلان یئنه ایشینه باشلاییر.

ـ «چوخ سسی‌سیز گؤرونور..». حیدر دئییر.

ـ «سئچه‌نک یولوموز یوخ! یوخسا وارمی؟» غلام دئییر. او اولدوقجا آز دانیشان بیری ایدی.

کیمسه جاواب وئرمه‌ییر. ایندی هاوا تام ایشیقلانمیشدی. اطرافی گؤرمک چوخ راحات اولموشدو. هله اوشویوره‌م..

ـ «سانیرام بیر زاد گؤرموشم..» توغرول اوجادان دئییر. گؤزلری اورمانین درین‌لییینه زیلله‌نمیشدی.

ـ «نه گؤردون؟!..» آرام اونا دئییرم.

ـ «امین دئییلم.. سانیرام بیر زاد گؤردوم..»

اؤزومه باخیرام. قیافه‌م چوخ دیدرگین گؤرونور. توغرول"ون زیلله‌ندیی طرفه گؤز تیکمیشم. سلاحیمی برک سیخیر اللریم. نئچه آن اورمانلیغا زیلله‌نیر هامی. آغر سوکوت سانجیر قولاقلاری. نفس آلمالار ائشیدیلیر. اؤزومه باغیریرام.. "اورماندا سیلاحلی‌لار وار.. اورادا عسکرلر وار.." نه یازیق کی اؤزوم سؤزومه باخماییر. بیر آن نه اولدوغومو و هارالی اولدوغومو اونوتموش اولدوم.

ـ «بورادا دیره‌نمه‌لی‌ییک..  سون قورشوناجان..» ایبی‌یه دئییرم.

ایبی باشی‌نین حرکتی ایله سؤزومو تصدیق ائدیر.

ـ «سنگر توتون.. بورا بیزیم سون دایاناجاغیمیز.. اؤلورسه‌ک آذربایجان اوچون اؤلوروک.. بیز قیزیلباش اوردوسوندانیق..»

ـ «عسکرلر..!» توغرول باغراندا، سینه‌سیندن بیر قورشون توتور. منی ده اؤزو ایله دالی آشیریر.

اؤزومه باخیرام. توغرولو بیر آغاجین آردینا چکمه‌یه چالیشیر. هره بیر آغاج آرخاسینا دالدالانیر. اورتالیقدان آچیلان قورشونلار یاتمیش آغاجلارین یوخوسونو پوزور. نئچه یئردن یارالانیرلار آغاجلار. توغرول «یاشا وطن.. یاشا اؤزگور آذربایجان» دئیه‌رک، حیاتا گؤز یومور. باشیمی آغاج آردیندان دیشاری چیخاردیرام. سیلاحلی عسکرلری آغاجلار آراسیندا گؤرمک ایمکان‌سیز نظره گلیر. بوشا نئچه قورشون آتیرام. ایکی ال بومباسی دا آغاجلار آراسینا سالدیریرام. اطرافا سپه‌له‌نن چومورلا اینسان باغیرتیلارینی دا دویورام. داها قارین، هاوانین سویوقلوغونو سئزمیره‌م. بورادان قورتولمایا هئچ اومید بکله‌میر اؤزوم. قورشونلار آراسیندا اومیدلر قیریلمیش. آنجاق اوزاقلاردا بیزه دوغان بیر اوفوقون اولماسیندان أمین ایدی اؤزوم.

نئچه ال بومباسی کناریمیزدا پارتلاییر. قار قیرمیزیلاشیر.. تیکه ـ پارچا اولموش سیلاحلی دوستلاریمین بده‌نلری آغاجلارا ساری آتیلیر.

قورشونلانمیش بده‌نیمی گؤرورم. بیر آغاج آرخاسیندا حرکت سیز قالیب. گؤزلری آچیلان اوفوقه تیکیلی..

جمعه آخشامی دیر. بو گونو ایللردیر سئویرم...

 

گؤنده‌رمه تارریخی: چهارشنبه 20 آذر‌ماه سال 1392 ساعات 09:10 ب.ظ یازار: حمید | چاپ مطلب
نظرات (7)
جمعه 11 مهر‌ماه سال 1393 03:29 ب.ظ
اکبر [ ]
امتیاز: 0 0
لینک نظر
یاشا سنی گوجلی یازار
وطن یولوندا اولمک شرفدیر و سیز بونو بو حیکایه ده گؤزل شکیل ده ایضاح ائتمیسیز.
سیزی باغلانتی لاریما قاتدیم.
شنبه 2 فروردین‌ماه سال 1393 01:05 ب.ظ
riza [ ]
امتیاز: 1 0
لینک نظر
ای چئویرن اورکلری، گؤزلری

دولاندیران ای گئجه،گوندوزلری

ای یئنی دن دئیشدیرن حاللاری

دئیشدیر أن یاخشی حالا بیزلری

یئنی ایلینیز موبارک
شنبه 14 دی‌ماه سال 1392 01:11 ب.ظ
افسانه [ ]
امتیاز: 0 0
لینک نظر
اجازه نیزله سیزی باغلانتیلاریما آرتیردیم
پاسخ:
سلام
ساغ اولون
جمعه 13 دی‌ماه سال 1392 09:57 ق.ظ
afsane [ ]
امتیاز: 0 0
لینک نظر
عشق اولسون
چهارشنبه 4 دی‌ماه سال 1392 02:22 ق.ظ
سوسن نواده رضی [ ]
امتیاز: 0 0
لینک نظر
صبیرسیزلیکله یولونو گؤزلورم رومانیزین، و امینم کی بیر چوخلارینین گؤزو یولدادیر سیزین گوجلو قلمینیزدن گلن آخیجی و شیرین بیر رومانی اوخوماق اوچون.
ادبیاتیمیز سیزین کیمی داواملی چالیشانلارا همیشه بورجلودور...
سه‌شنبه 3 دی‌ماه سال 1392 10:48 ب.ظ
riza [ ]
امتیاز: 0 0
لینک نظر
سلام لار
بیرینجی اؤیکوم وبلاگدا یاییلدی.باخیشلاریز منی سئویندیرر
یکشنبه 1 دی‌ماه سال 1392 09:59 ب.ظ
سوسن نواده رضی [ ]
امتیاز: 0 0
لینک نظر
قلمینیز اوخوجونون خیالینی چکیب آپاریر اؤزویله...چوخ چوخ اوزون زاماندیر قلمینیزله تانیشام، گونو گوندن داها گوجلولشیر، داها زنگینلشیر.
سیزدن همیشه بیر رومان بکلمکده یم...
پاسخ:
ساغ اولون حورمتلی شاعیره میز..
قار ، قان ، بایراق عنوانلی یازی رومان دیر. بیرینجی بولومونو وئبلاگدا یاییمیشام. بو تئزلیکده اونون آردینی یایاجایام.
برای نمایش آواتار خود در این وبلاگ در سایت Gravatar.com ثبت نام کنید. (راهنما)
نام :
پست الکترونیک :
وب/وبلاگ :
ایمیل شما بعد از ثبت نمایش داده نخواهد شد