اییلمه‌ین باشلار - حمید آرغیش

ـ«گئچ ایچَری»!!

د‌میر قاپی‌یا طرف دؤندو.  قیسا دمیر قاپی‌نین اورتا حیصه‌سینده اولان بالاجا دربه‌چه‌دن ایچری باخدی.  قارانلیق بارماقلیقلار آراسیندان او کیچیک محوطه‌یه سوزوردو.  او محوطه‌نی ایشیقلاندیران الکتریک لامپانین ایشیغی ند‌نسه او باجادان او طرفه گئتمه‌یه جورعت تاپمیردی. ‌ ساغ الی‏ایله قاپینی یاواشجا ایته‌له‌دی.  قارانلیق قایناییردی اؤنونده.  

ـ»گئچ ایچری!!.  « یوز باشی‌نین گوبود سسی بیر داها قالخدی.  گئری دؤنوب یوز باشی‌ و اونون کناریندا دوران اون باشی و قیسا بویلو، قارا بنیزلی عسکره باخدی.

ـ «بو ایتی باخیش­لارین بو قارانلیقدا پارلاماسی اولمایاجاق.  گیر ایچری. » دئیه­رک گولومسه‌دی یوز باشی.

بدنین آزجا کنارا ایه‌رک قارانلیغا آددیم آتدی.  

ـ»سن بو قاپیدان کئچمه‌یه باشینی اَیمه‌سنده آنجاق باشینی آشاغی اَیمه‌یه چوخلو یول وار»

گنج و یئنی یئتمه ایدی.  قیرمیزی لکه‌لر ‌دوشموش آغ کؤینگی‌نین ایکی دویمه‌سی سؤکولوب دوشموشدو.  آغ سینه‌سی ایلک باخیشدا گؤزه چارپیردی.  حیاتیندا ایلک دفعه‏ایدی امنیت مامورلاری‏ایله اوز ـ اوزه گلیردی.  ایچینده مبهم و گیزلین بیر قورخو اولسادا ندنسه هئچ وئجینه آلمیردی.  اوره‌گینده عظمتلی بیر غرور حیسسی یاشاتمیشدی بو گون.  بو اوزدن اون‌باشی‌نین بو سون سؤزلرینی ساده‌جه بیر تبسمله جاوابلاییب، یالین آیاقلارلا ایچری گیردی.  

 یادینا گلندن شهرین بو اصلی خیابانی بئله ازدحاملی، بئله امنیتی بیر آتموسفرده گؤرمه‌میشدی.  اود سؤندور‌ن ماشین‌لاری ایلک دفعه خیاباندا دایانمیش گؤروردو.  پلیس مامورلاری توپلانان‏لاردان داها چوخ نظره گلیردی.  سیرایا دوزولموش و تپه‌دن دیرناغاجان یاراقلانمیش پولیس مامورلاری ند‌نسه بیر زادی بکله‌ین کیمی اطراف‏لارینا باخیردیلار.  پیادا یول‏لاری اولدوقجا ازدحاملی و قالابالیق گؤرونوردو.  باخیش‏لاردا حیرت، نادینج‌لیک و عصیان دالغالانیردی.

ـ «آنجاق اینقلابدا دا بو شهرده بئله بیر وضعیت گؤرمه‌دیم من هئچ!!! بیلمیرم بودا بیر اینقلاب اولاجاق یا گله‌جک اینقلابین ایلک قیغیلجیمی­دیر. »

ـ«آتا ! هامی ساکیت گؤرونور.  ساده‌جه بیر اعتراض توپلانتی‌سیدیر».

ـ«یوخ!! یوخ!! هئچ یانیلما.  بیر میللتین وارلیغی و ناموسو لکه‌لَننده سانمیرام ساده بیر اعتراض کیمی میللت داورانسین.  باخیش‏لارا باخ!! هامی بیر زادی گود‌ر کیمی‌دیر.  بو پارتلامایا حاضیر بیر وولقان دیر.  ایللردیر ایچریده جوشوب اود و آلوونو بیریکدیریب.  پارتلاییرسا کیمسه قاباغین آلماغا قادیر اولمایاجاق.  بو قضیه‌ده میللتین کیملیگینه توهین اولونوب».  

اونلارین سؤزلرینی اختیارسیز دینله‌مگه نئچه آن ازدحام ایچینده دایاندی.  سونرا خیابانین آشاغی طر‌فینه گونده‌لیک ساتان پوتکایا طرف آددیم‌لادی.

 جوپلانمیش بدنی اولدوقجا آغری‌ییردی.  قول­لاریندا هئچ بیر حیس گوجو دویموردو.  پارتلامیش سول گؤزوندن آخان قان آغزینین قانی‏ایله قاریشیب کؤینگینی تیلیت قان ائتمیشدی.  داخمانین قارانلیغیندا نه دورومدا اولدوغونو دوشونه بیلمیردی.  ساده‌جه بدنی‌نین نئچه یئردن یارالانماسینی دوشونوردو.  بئحال و سوسقون داخمانین بللی اولمایان بیر طرفینده بوکولو قالمیشدی.  بدنی یاواش ـ یاواش اوشومگه باشلامیشدی.

 نئچه آن اؤنجه ایکی یاندان بونا یوگورن‌لرین پیچیلتی سسلرینی آزاجیق ائشیدیردی.

ـ«دوروم آغیرلاشیر.  توتوب ، اؤلدورمک‏له ده قورخورام اورتالیغین بو پوزغونلوغو دوز‌لمه‌سین. »

ـ«باشقا شهرلردن گلن گزارش‌لره گؤره وضعیت بوندان دا داها دیدرگین دیر.  بعضی شهرلرده جاوان‏لار سینه‌لرینی آچیب پولیس مامورلارینا «وورون سینه‌میزدن!» دئییرلر. نئچه نفری ده سینه‌لریندن ووروبلار.  بیر نئچه آرواد اوشاق دا اؤلوب.  

ـ «الیمیزدن بو گلیر آنجاق.  تهران‏دان گلن دستورلار بو حرکت‌لرین تئزلیکله قورتولماسین ایسته‌ییر.  آذربایجان شهرلرینه اؤز‌ل مامورلار گؤندریلیب.  مرکز اؤزو بو حرکت‏لری کنترل ائتمک ایسته‌ییر.  بوتون امنیت اورقانلاری آغیر باسقی آلتیندا دیرلار.  سانیرام قویمایالار بو اعتراض‌لار چوخ داوام ائتسین.  مملکتین انسجامی پوزولماقدادیر.  بیر ده بونلار!! بونلار بورادان جان‏لی چیخمامالیدیرلار.  أن آزی بو تئزلیکده بونلاری بوراخماق اولدوقجا خطرلی دیر.  بو تاکید ائدیلمیش دستوردور اوست‏دن».

سس‏لر اوزاقلاشیردی.  دوشونوردو اونلار گئدیرلر.  آنجاق تکجه گؤره بیلن گؤزو گئت ـ گئده آغیرلاشیردی.  بدنی‌نین تامام حیصه‌سی آغیرلاشمیشدی.  آلنی‌نین اورتاسیندا بیریکیردی تامام آغریسی.  باشیندا چیلغین سس‏لر، قیشقیرتی‏لار، قاوالامالار، وورمالار و آچیلان قورشونلارین سس‏لری سینما فیلمی کیمی تکرار ـ تکرار فیرلانیردی.

آلاولار ایچینده ایران کلمه‌سینی آیدینجا اوخویا بیلدی.  گونده‌لیکلردن آلیشان اودون اطرافی اولدوقجا ازدحام‏لی و قالابالیق‏ایدی.  نئچه نفر یئره تؤکولموش یاری یانیق کاغاذلاری آیاقلاییر و توپوروردولر.  هر طرف‏دن یاشاسین آلقیش‏لاری گؤیه اوجالیردی.

خیاوانی جاماعات تامام دولدورموشدو. پولیس مامورلاری چوخ ازدحام‏لی یئرلردن آزاجیق فاصله‏ایله دورموشدولار.  نئچه پولیس ماموری شخصی گئییمده جاماعات‏دان فیلیم چکیردیلر.  

ـ منیم دیلیم اؤلن دئییل؛ فارس دیلینه دؤنن دئییل.

ـ یاشاسین آذربایجان؛ محو اولسون استبداد.

ـ اؤلوم اولسون شووونیزمه.

شعارلاری هر طرفدن اوجالمیشدی.  بیر آن اؤزونو او ازدحام‌لارین آراسیندا گؤردو.  یومروقلاری دویونلنمیشدی.  سینه گرمیشدی.  «یاشاسین آذربایجان» باغیریردی.

ـ «چوخدان دیر داها اینله‌مه‌سی کسیلیب.  اولمایا بو دا ابدی‌لیک دینجه‌لیب!!!» .  اوجا بویلو اون باشی گولومسه‌دی.

ـ«سانمیرام!» ـ ماسا آرخاسیندا اوتوران قیسا بویلو عسکر دئدی ـ «بونو او قد‌ر دؤیمه‌دیلر کی!! ساده‌جه نئچه دفعه جوپلادیلار. »

نئچه لحظه سوسور:

ـ «هله دوشونورم بونلار ندن اؤزلرینی بو قد‌ر هئچ بیر زاد اوسته اودا ـ کؤزه وورورلار.  کیملییی ده بللی دئییل بونون.  ساده‌جه گنج بیر اوغلان.  مین‌لرجه خیاباندا گؤردویوموزلر کیمی.  مندن بیر ایکی یاش کیچیک. »

نئچه لحظه سوکوت حاکیم اولور.

ـ «اونا بیر باش چک.  امنیت ایداره‌سیندن گلیب آپاراجاقلار.  گزارش‏ده یازیلدیغی اساس‏دا ان اودا ـ کؤزه وورانلاردان بیری بو. »

ماسا آرخاسیندان آیاغا قالخیب دمیر قاپی‌یا طرف یئریدی.  دربچه‌دن ایچری باخدی.  

ـ «چیراغی یاندیر. !!» اون باشی دئدی.

دمیر قاپی دابانی اوسته دولانیب آچیلدی.

ـ «دوشونورم باش گؤزوندن توتوب بونون او چوپلار.  تیلیت قان ایچینده­دیر. »

ـ «بوش وئر بونلاری!!.  هوشدامی؟»

جاواب گؤزله‌ییر اون باشی.

ـ «اون باشی بورا گلین.   بورا گلین» عسگر اوجادان باغیردی.

ـ‌ «باخین! باخین.  سانیرام اؤلموش. »

قان‏لا تورپاغا قاریشمیش بدنی بؤیرو اوسته داخمانین تکینه سریلمیشدی.  قان باسمامیش آچیق گؤزو قاپی‌یا طرف تیکیلی قالمیشدی.  

ـ «هله ده باخیشی ایتی و پارلاق­دیر. » اون باشی دوداق آلتی میزیلدادی.  

ـ «باخین.  باخین!!» ـ دئیه ـ الی‏ایله اونون قانلی بارماق‏لارین و سونرا اؤنونده کی دیواری گؤستردی.

 «بونلار نه‌دیر دیواردا یازیب. ؟!!».

نئچه لحظه داخمانین مرمر دیواری اوسته قیرمیزی بویا ایله قاریشمیش أیری ـ اویرو یازیا گؤز تیکدیلر.  نئچه لحظه ساکیت و حرکت‌سیز دونوق قالدیلار.  ترپنمه‌یه گوج‏لری توکنمیشدی سانکی.  نهایت عسکر باشین یازیا طرف اوزاتدی.  سینیق سالخاق اوخودو:

«بیز. . .  بیز دونیانین قورخو بیلمز بیر قهرمان ائلی‌ییک.

آلوولار. . . دان.  یارانیلمیش.  آذربایجان ائلی‌ییک. »