X
تبلیغات
رایتل

گونئی آذربایجان حئکایه ادبیاتی

حمید آرغیش - ین حئکایه و مقاله‌لری

قیزیل آلما - حمید آرغیش


 آی‌ باشین‌ قارا بولودلارین‌ آرخاسیندان‌ ائشییه‌ چیخاریب‌ گوموش ‌ساچلارین‌ کیشی‌نین‌ اوزونه‌ سره‌نده‌، نئی‌ین‌ حزین‌ سسی‌ ائشیدیلدی‌. بیر قاپی‌ سس‌ وئرمه‌دن‌ آچیلدی‌. همیشه‌ حسرتینده‌ اولدوغون‌ قیزیل ‌آلمالارین‌ بیری‌ آغاجدان‌ اوزولدو. آغاجدان‌ آیریلان‌ آلما دیغیرلانیب‌ باشی‌ گؤرونن‌ و ساکیت‌ آخان‌ ایرماغین‌ سویونا اؤزونو چاتدیردی‌. أللریمی‌ قاباغا اوزاتدیم‌. أللریمین‌ بوش‌ آیالاری‌ گؤزومه‌ ده‌یدی‌ 
 کیشی‌ نئیینی‌ دوداقلاریندان‌ اوزاقلاتدی‌... سوْدا اوزه‌ن‌ آلما بیر داش‌ کناریندا دایاندی‌. کیشی‌ یئریندن‌ بیر آز قیمزاندی‌. اونا زیلله‌ندیم‌. ماوی‌ بیر گولوش‌ کیشی‌نین‌ دوداقلارینی‌ بویادی‌. انتهاسی‌ گؤرونمه‌ین‌ بیر چمن‌لیکده‌ بیر قیز، قیزیل‌ گوللره‌ بنزه‌ین‌ کیچیک‌ گوللر ایچره‌ اوفوقده ‌قورولموش‌ چادیرا ساری‌ قاچیردی‌.. قیز بیر لاله‌نین‌ کناریندا چؤمبه‌لدی‌. ألینده‌ بیر شوی‌ اولان‌ کیشی‌، نئی‌ دوداغیندا، حزین‌ سسلر ایچره‌ غرق اولموشکن‌ قیزا ساری‌ گئتدی‌. اوزاقلاردا دومان‌ ایچره‌ چادیرین‌ قارالتیسی‌ گؤرونوردو. گوموش‌ پول‌ کیمی‌ پارلایان‌ بیر دالغاجیق‌ آلمانی‌ یولا سالدی‌. کیشی‌ اوتوردو. هله‌ نئی‌ دوداغی‌نین‌ کناریندا ایدی‌. جیبیندن‌ بیر تیکه‌ کاغیذ چیخارتدی‌... مکتوبا چوخ‌ بنزه‌ییردی‌. یاز رایحه‌سی‌ وئریردی‌ او کاغیذ. هوسله‌ کاغیذی‌ آچدی‌.. آی‌ گوموش‌ ساچلارین‌ چؤلدن‌ گؤتوردو. آلما هله‌ سودا دالغالار آراسیندا اوینایا ـ اوینایا گلیردی‌.

کیشی‌: "اولسون‌ بلکه‌.."

نئیین‌ سسی‌ یئنی‌دن‌ اوجالدی‌. بؤجک‌لر نئچه‌ لحظه‌ ایدی ‌سوسموشدولار. بیر حزین‌ سس‌ قولاغیما ده‌یدی‌. "یو..شو.." ـ تئز کسیلدی‌. دالیسین‌ توتمادیم‌.. داش‌ ـ قایالار نئیین‌ سسینده‌ اوزوردولر. کیشی‌ بیر داش‌ اوستونده‌ اوتوردو. آخار بیر چای‌ داشین‌ چئوره‌سیندن ‌اؤزونه‌ یول‌ آچدی‌ آت‌ کیشنه‌دی‌ بیردن‌. داوار قوخوسو بورنوما ده‌یدی‌. کاغیذ سو اوسته‌ اوزوردو. آخار چایا باخدیم‌. آلما پارلاییردی‌ بیر ایت‌ هورمه‌سی‌ قولاغیما چاتدی‌. بیر آز دیقت‌ ائتدیم‌. سانکی‌ کوچه‌ده ‌ایدی‌. داها هورومه‌دی‌ نئیین‌ سسی‌ قالخاندا آت‌ کیشی‌نین‌ یانیندا ایدی‌. آیین‌ شوعاسی‌ سیزیر، وحشی‌جه‌سینه‌ چؤلون‌ عطیرلی‌ قوخوسو ایله‌ گؤیدن‌ یئره‌ تؤکولوردو. آت‌ باشین‌ بولادی‌. آخار سویو اییله‌دی‌. نئچه‌ دفعه‌ سوْیون‌ اویان‌ ـ بویانینا کئچدی‌. بیردن‌ گونئیه‌ دوغرو قاچدی‌. آمما بیردن‌ دایاندی‌. باشین‌ گؤیده‌ سایریشان‌ اوُلدوزلارا ساری‌ توتدو. گئری‌ دؤندو. قوزئیه‌ ساری‌ قاچدی‌. سویون‌ شیریلتی‌سیندان‌ کیشی‌ اؤزونه‌ گلدی‌. کاغیذ خئیلک‌ اوزاقلاشمیشدی‌. آی‌ سودا ساکیت‌ دورموشدو. کیشی‌ اللرینی‌ سویا باساندا آی‌ بارماقلاری‌ آراسیندان‌ قاچدی‌ سودا گلن‌ آلمانی‌ آختاردیم‌. یاخین‌لاشمیشدی‌. همیشه‌ بو لحظه‌نی‌ گؤزله‌ییردیم‌. کیشی‌نین‌ گؤزلری‌ آلمایا ساتاشاندا سو دالغالاندی‌. آی‌ سودان‌ ائشییه‌ چیخدی‌. گؤزلریم‌ قاماشدی‌. گلین‌ پالتاریندا اولان‌ بیر قادین‌ سو اوستونده‌ گؤروندو.

"چال‌!..خان‌" دئدی‌. نئی‌ین‌ سسی‌ گؤیدن‌ یئره‌ اوزاندی‌. اختیارسیزجا گولومسه‌دیم‌. بیر حزین‌ سس‌ قولاغیما ده‌یدی‌. چوخ‌ یاخیندان‌ ایدی‌. دیکسینیب‌ اویانیرام‌. اوره‌ییم‌ بتردن‌ چیرپینیر. پنجره‌مین‌ آلتیندان‌ نئی‌سسی‌ گلیردی‌...

سون  24/10/77

======================

و سنین حئکایه لریم...  کیتابیندان

گؤنده‌رمه تارریخی: چهارشنبه 27 شهریور‌ماه سال 1392 ساعات 01:04 ب.ظ یازار: حمید | چاپ مطلب
نظرات (3)
سه‌شنبه 19 آذر‌ماه سال 1392 07:57 ب.ظ
محمود دالغا [ ]
امتیاز: 0 0
لینک نظر
بیر حزین سس قولاغیما دیدی.
یئنی دن اورگیم تیتره دی الیم اسدی، آمما قووتلن دیم
یئنی دن بیلدیم کیمم.
سه‌شنبه 2 مهر‌ماه سال 1392 04:37 ب.ظ
riza [ ]
امتیاز: 0 0
لینک نظر
چوخ سئویندیم وبلاگیما باش وورماغیزدان...منجه حمید آرغیش معاصر اؤیکو ساحه سینده ان گوجلی یازارلاردان ساییلیر.
شنبه 30 شهریور‌ماه سال 1392 10:58 ب.ظ
h.v [ ]
امتیاز: 0 0
لینک نظر
نظر خصوصی

salam

necəsiz bəy
sizə Email göndərmişdim heç cavab vermədir
həmdə bloqunuzda vurğulamışdım
پاسخ:
سالاملار
بو سون گونلر باشیم بیر آز قاریشیق. «بیزیم حئکایه‌میز..» عنوانلی بیر کیتابلا اوغراشیرام. یازیلارینیزین بیر ایکیسینی اوخویا بیلدیم. آنجاق هامیسینی اوخوماغا زامانیم اولمادی. لطفا باغیشلایین.
برای نمایش آواتار خود در این وبلاگ در سایت Gravatar.com ثبت نام کنید. (راهنما)
نام :
پست الکترونیک :
وب/وبلاگ :
ایمیل شما بعد از ثبت نمایش داده نخواهد شد