گونئی آذربایجان حئکایه ادبیاتی

گونئی آذربایجان حئکایه ادبیاتی

حمید آرغیش - ین حئکایه و مقاله‌لری
گونئی آذربایجان حئکایه ادبیاتی

گونئی آذربایجان حئکایه ادبیاتی

حمید آرغیش - ین حئکایه و مقاله‌لری

تیکانلی مفتیل‌لر - حمید آرغیش

نئچه‌ لحظه‌ ایدی‌ کی‌، تیکانلی‌ مفتیل‌لرین‌ آرخاسیندا دایانمیش‌، ماراقلا او تایا باخیردی‌. تیکانلی‌ مفتیل‌لردن‌ نئچه‌ متر اویاندا، انلی‌ چای‌، اؤزونو ساحیلین‌ داشلارینا چالا ـ چالا قارانلیقدا محو اولوردو.

نئچه‌ گون‌ ایدی‌ بو منطقه‌یه‌ عسگر وئریلمیشدی‌. کیمسه‌نی بورادا تانیمیردی.. هله‌ اؤزونه‌ بیر یولداش‌ دا تاپا بیلمه‌میشدی‌.. 

 نئچه‌ یئردن‌ چایین‌ اوستونه‌ کؤرپو سالینمیشدی‌. کؤرپولرین‌ اطرافیندا زنجیر، زنجیرلرین‌ کناریندا سیلاحلی‌ عسگرلر.

ایلیق‌ هاوادا، کنارینداکی‌ کؤرپویه‌ باخدی‌. ایکی‌ ساحیلی‌ بیر ـ بیرینه‌ قوووشدوران‌ کؤرپو اوسته‌ کیمسه‌نی‌ گؤره‌ بیلمه‌دی‌. درین‌ بیر سوکوت حاکیم ایدی.. سورعتله آخان سویون‌ شیریلتی‌ سسیندن‌، قولاقلاری‌ قاماشیردی‌. هئچ‌ اومیدی‌ یوخ‌ ایدی‌ بورایا دوشسون‌! اؤلکه‌نین‌ سون‌ سرحددی‌ بیلیردی‌ بورانی‌! درسلیک‌ جوغرافی‌ و ادبیات کیتابلاریندا بئله‌ اوخوموشدو.. "آرش‌"ـ ین‌ یایی‌ و قدرتلی‌ قوللاری‌ نئچه‌ لحظه‌ گؤزو اؤنونده‌ دایاندی‌... شیرین‌بیر افسانه‌ بو...

اوز به‌ اوز ساحیلدن‌ سرین‌ بیر یئل‌ تانیش‌ بیر ماهنی‌ سسینی‌ گتیردی‌ بو تایا، سودان‌، مفتیل‌لردن‌ آشا ـ آشا اوشاقلیقدا دا بئله‌ بیر ماهنی‌نی‌ دینله‌میشدی‌، آناسیندان‌ و آتاسی‌نین‌ سازی‌نین‌ تئل‌لریندن‌.. بورایا گلمه‌دن‌ دئمیشدیلر: "اؤلکه‌نین‌ سرحدینده‌ خیدمت‌ ائتمه‌یه ‌گئدیرسیز!! چوخ‌ احتیاطلی‌ اولماغینیز گره‌کدیر". نئچه‌ لحظه‌ درین‌ بیر اوچورومون‌ تکینده‌ اؤزونو گؤردو، ابهاملی‌ سسلر ایچره‌ دریندن ‌تؤوشه‌دی‌. اللرینی‌ اطرافا آچیب‌ قارانلیغا بورونن‌ عطیرلی‌ هاوانی‌ دریندن‌ سینه‌سینه‌ چکدی‌. چوخ‌ تانیش‌ ایدی‌ بو هاوانین‌ قوخوسو. یونگوللوک‌ دوُیوردو اؤزونده‌ بیر داش‌ گؤتوروب‌ تیکانلی‌ مفتیل‌لر اوستوندن‌ سویا آتدی‌ اوز به‌ اوز ساحیلده‌ چوخ‌ اوُزاقلاردا، بعضی‌ یئرلرده‌ چیراقلار بنک‌ ـ بنک‌ یانیردیلار... او تایدان‌ ایسه‌ بیر داش‌ سویا آتیلدی‌. دیقّت‌ ائتدی‌؛ اونو گؤردو. اؤزو کیمی‌ بیر عسگر ایدی‌ او. الین‌ ترپتدی‌ بونا! سونرا ساغ‌ الین‌ ایره‌لی‌ اوزاتدی‌. سانکی‌ بونلا گؤروشمک ‌ایسته‌ییردی‌! آرالاریندا انلی‌ بیر چای‌ اولسادا الینده‌ بیر قیزغین‌لیق‌ و ایستی‌لیک‌ دویدو. اوره‌یی‌ شیدتله‌ دؤیونمه‌یه‌ باشلادی‌..

آخشام‌ یاتاغا گیره‌ندن‌، سحره‌جن‌ هئچ‌ یاتا بیلمه‌دی‌. بوغازینا بیر زاد تیخیلمیشدی‌ سانکی‌. ایندی‌یه‌جن‌ بئله‌ بیر وضعیتله ‌قارشیلانمامیشدی‌... سورعتله‌ آخان‌ چای‌، هر ایکی‌ اؤلکه‌نین‌ آدی‌نین ‌بیر اولدغو، تانیش‌ ماهنی‌لار و هر زاددان‌ آرتیق‌ تیکانلی‌ مفتیل‌لر اونو فیکره‌ سالمیشدی‌.

 

نظرات 0 + ارسال نظر
برای نمایش آواتار خود در این وبلاگ در سایت Gravatar.com ثبت نام کنید. (راهنما)
ایمیل شما بعد از ثبت نمایش داده نخواهد شد