گونئی آذربایجان حئکایه ادبیاتی

گونئی آذربایجان حئکایه ادبیاتی

حمید آرغیش - ین حئکایه و مقاله‌لری
گونئی آذربایجان حئکایه ادبیاتی

گونئی آذربایجان حئکایه ادبیاتی

حمید آرغیش - ین حئکایه و مقاله‌لری

اؤلوم هورمه‌سی - حمید آرغیش

«... بیزیم بختور و خوشبخت‌لییمیز وطنین آزاد و مستقل‌لیینده دیر..»


گون اورتایا یاخین ایدی. اینجه پامبیق کیمی بولودلار گونشین اؤنوندن کئچرکن آلاناراق، اوزاقلاردا داغلار آرخاسیندا قایب اولوردولار. کیچیک کندین اوغروندا اولان بیر یام یاشیل تپه‌نین کؤکسونده «اوغوز» یوخلامیش یا اوتلاماقدا اولان قویون سوروسو ایله اوتورموشدو. گاهدان قورو یئل اسیر، یاخیجی گونشین ائتکی‌سینی خفیف‌لندیریر، اوغوزون آلینا قونان تری قورودور، اوشودوردو آلینینی.

اوغوز یانینداکی بوخچانی اؤنونه چکدی. سورونون ایتی سانکی ناهار چاغینی آنلامیش، بیر داشین کؤلگه‌سینه سیغیندیغی یئردن قالخیب، اوغوزا ساری گلدی.. بو ایش ایته عادت اولموش کیمی گؤرونوردو. او هر گون اؤیلن چاغی ایکن اوغوز”ون کناریندا دایانیب ناهار پایینی آلاردی…


اوغوز اوتوردوغو یئرین دؤوره‌سینه داوارلار یاییلمیشدیلار. بعضی‌سی اوتلاییر، بعضی‌سی ایسه اوزانیب یا یاواشجا گؤوشه‌ییردیلر..

اوغوز بوخچاسینی آچمیش، یئمکده ایدی. ایت اوغوزون یانینا چاتارکن دال قیچلاری اوسته اوتوروب، اللرینه سؤیکه‌ندی. گؤزلرین اوغوزا تیکدی. اوغز ایته باخیب: «سن ده آجیبسان حئیوان؟!» دئیه ایتی هایلادی. ـ «گل! گل توت!»

بیر تیکه چؤره‌ک ایتین قاباغینا آتیلدی. ایت قورد هورومه‌سینه اوخشایان بیر سس چیخاردیب یئمه‌یه باشلادی.

اصلینده بو ایت، قورد تولاسی ایدی. اوغوز اونو تولالیقدان سورو و سورو ایت‌لریله بئجرمیشدی. آنجاق دئدیکلرین ترسینه بو «قورد دان اولان» قورد اولمامیشدی!

ایت چؤره‌یی آغیزیندا اویان ـ بویانا آتاراق اوتدو. ایت هر گون ناهارا چؤره‌ک و اوغوزون ناهاریندان نه قالیرسا یئیه‌ردی.

ایت قویروغون یاواشجاسینا بولادی. دئمک باشقا بیر تیکه‌نی گؤزله‌ییردی. اوغوز نئچه تیکه ده اونون قاباغینا آتدی. ایت اوغوز”لا برابر ناهارین بیتیردی. سونرا قویروغو ساللانمیش حالدا، اؤنجه داشین کؤلگه‌سینه سیغیندیغی یئره گئتدی.

داها اوغوزون چایی اوجاق اوسته دمله‌نمیشدی. گوه‌ن و چؤل تیکانلاری‌نین آلیشما سسیندن باشقا بیر سوکوت دینله‌نمیردی. اوغوز قوروشقاسین دولدوروب دیزی آلتینا قویدو. سونرا بوخچاسین آراییب، آغاجدان یونولموش و دوزه‌لمیش بیر دودویو چیخارتدی. اسکی بیر آذربایجان هاواسی داغ ـ دره‌نی بورودو. حزین سس نارین و اینجه ـ اینجه آغلاما کیمی داغ ـ دره‌نی اوخشاییردی. بو هاوا دودوک تک آتاسیندان یادیگار قالمیشدی. آتاسینا دا آتاسیندان…

اوغوز بو هاوانی چوخ سئویردی. هر دفعه دودویو دودغینا آلماق ایسته‌ینده اختیارسیز بو هاوانی ترنم ائدردی. آتاسینی خاطیرلاداردی اونا! آتاسی سون گؤروشلرینده چوخ شاد گؤرونورکن چوخاسینی چیخارتمیش، عسگر پالتاری گئیمیشدی. او آذربایجاندا تزه‌جه قورولموش فرقه‌یه کؤنول‌له قوشولموش، وطنی مدافعه ائتمه‌یه گئدیردی. آتاسی الین اونون چینینه قویوب دئمیشدی:

ـ «ایندی ائوین کیشی‌سی سن‌ اولوبسان.. وطنین منه و منیم کیمی عسگرلره بو گون چوخ نیازی وار.. وطن بیزی چاغیریر.. بیزیم بختور و خوشبخت‌لییمیز وطنین آزاد و مستقل‌لیینده دیر».

و سونرا بیر خاطیره کیمی خاطیرده قالمیشدی سون گئدیشی. و بیر داها گئری دؤنمه‌میشدی   …

بیردن ایت اوتوردوغو یئردن قالخیب قولاقلارین شوشله‌دی. نئچه کره هورودو. اوغوز ایته باخدی. سونرا ایتین زیلله‌ندییی طرفه گؤز دولاندیردی. اوزاقدان نئچه کؤلگه اونلارا یاناشیردیلار. قووزانان توز ـ دومان آراسیندا اوغوز اونلارین هئیکل‌لرینی آنشیرا بیلیردی. لحظه‌لر اؤتدوکجه اوغوز اونلاری آرتیق سئچه بیلیردی. اونلار یاناشدیقجا آیاقلاری آلتیندا یئر تیتره‌ییردی.

اینتیظاملی بیر سیرادا حرکت ائده‌ن بیر آلای عسگر اوغوزون کنارینا چاتدی. ایت آراسی کسیلمه‌دن هورویور، سانکی اونلارا یورومه‌یه بویوروق گؤزله‌ییردی اوغوزدان.. دسته باشی اوغوزون ایکی آددیمیندان کئچدی. قویونلارین اراسیندا سانکی قورد دوشموشدو. هره‌سی بیر طرفه یاییلمیشلار. توز ـ تورپاق عسگرلرین آیاقلاری آلتیندان گؤیه سوورولوردو. عسگرلرین قیافه‌لریندن یورغونلوق دالغالانیردی.. اونلارین یاراقلاری گونون یاخیجی و وحشیجه شاخان شوعالاری آلتیندا پاریلداییردی.

بو ایلک دؤنه دئییلدی کی، اوغوز یاراقلی بیر آلایی گؤروردو. بو سون ایللرده کنددن بیر آز آرالی بیر ساخلوو تیکیلمیشدی و اوغوز گاهدان گزمه‌یه یا قاچماغا دیشاری چیخان عسگرلری دفعه‌لرله گؤرموشدو..

عسگرلر بیر ـ بیر اونون اؤنوندن کئچیب، یئنه توز ـ دوماندا غیب اولوردولار، بیر حالدا کی آرخالاریندا بیر دومان یادیگار قالمیشدی.

×××

آخشا اوستو ایدی.  گاهدان داغلاردان أسن سازاق، اوغوزون کؤمور قاراسی قارا تئل‌لرین اوخشاییردی. گونش گئتدیکجه اؤزونو داغلارین آرخاسینا ساری یورغون ـ یورغون چکیردی. باتی‌دا، گونشین دینجه‌له‌جک یئری اولان داغلارین باشیندا کی سایخاش دوران بولودلار آل بوْیانمیشدیلار. گئجه‌نین قارا اوردوسونون قاراوول‌لاری گؤرونمه‌یه باشلامیشدی.

اوغوز سورونو ییغیردی. ایت هردن هافیلداییب، اویان ـ بویانا قاچاراق داوارلاری بیر یئره توپلاییردی. قویونلارین بع ـ بع سسلری چؤلون اوجالماقدا اولان بؤجک‌لرین سسلرینی چولقامیشدی.

اوزاقلاردا یئری بللی اولمایان بیر قوردون اولاماسی اؤلوم ماهنیسی کیمی گاهدان داغ ـ دره‌یه یاییلیردی.

اوغوز سورونو کنده ساری سوردو. سورو بو یولو یوزلرجه دفعه گلیب، گئری دؤنموشدو. کیمسه یاردیم ائتمه‌دن ائوی تاپیب ایتمه‌دن، آزمادان مقصده چاتا بیلردی.

ایت سورونون ساغ طرفینده تمکین‌لی آددیم‌لار آتیردی. هردن ده اوغوز اونون هورومه‌سینی داوارلارین سسلری آراسیندان ائشیدیردی.

داوارلارین اوتلاماق یئری قصبه‌نین اوستونده قرار تاپان بیر تپه‌جی‌یین دؤشو ایدی.

هله یولون چوخو گئدیلمه‌دن، اوغوز آیاغینا آغیر بیر زادین توخونماسین دویدو. دایانیب اونا باخدی. قارانلیقدا نه اولدوغونو سئچه بیلمه‌دی. أییلیب اونو توز ـ تورپاق ایچیندن اووجونا آلدی. توز ـ تورپاغی سیلین‌سین دئیه، نئچه دفعه کؤینه‌یینه سورتدو.

یئنه نئچه لحظه ایدی کی، یئری بللی اولمایان قوردون سسی اوجالمیشدی. هاوا یاواش ـ یاواش تام قارانلیق‌لاشیردی. قصبه‌نین آراسیرا یانان ایشیق‌لاری گؤرونمه‌یه باشلامیشدی. سورو ایتی گاهدان اوغوزا باخیر، باشینی گؤیه توتاراق اوجادان هافیلداییردی. اوغوز آستا ـ آستا آددیم آتاراق الینده کی جسم ایله اویناییردی.

یئنه قوردون سسی قالخدی. بو دفعه اولدوقجا یاخیندا اولدوغو سئزیلیردی. اوغوز نئچه دفعه اطرفینا گؤز دولاندیردی لاکین هئچ نه آلدیرمادان تاپدیغی ایله اوینامایا داوام وئریردی. سورو ایتی هامیدان آرخادا آددیم‌لاییردی. بیردن یئرینده دایانیب دریندن و اوجا بیر اولاییشا پناه گتیردی. لاکین اونون سسی کسیلمه‌دن دهشتلی بیر پارتلاییش اوغوز اولان یئردن قالخیب، اوغوزون بده‌نی‌نین تیکه‌لری اود پارچالاری ایله بیرگه چؤلون توز ـ تورپاغینا یاییلدی. پارتلاییش سسیندن سورو اطرافا داغیلدی. ایت ده بیر طرفه جومدو. ایت گئری دؤنوب اوغوزون باشینا نه گلدییینی بیلمه‌یه جورعتی یوخ ایدی. سوکوت نئچه آن کؤوشنی بورودو.

اوغوز تورپاق ایچیندن تاپان زاد عسگرلرین بیریسی‌نین ال بومباسی ایدی کی، قاچاندا کمریندن دوشموش و اوغوزا قیسمت اولموشدو.


نظرات 3 + ارسال نظر
سوسن نواده رضی سه‌شنبه 4 تیر‌ماه سال 1392 ساعت 09:47 ب.ظ http://shokufeh.mihanblog.com

سلام و سایقی‌لار ده‌یرلی حیکایه یازاریمیز.
هر زامانکی کیمی گؤزل بیر حیکایه‌یه قوناق اولدوم وئبینیزده. حیکایه‌نین اوزوجو سونونا رغمن، شیرین قلمی‌نیزدن لذت آلدیم.
داها- داها آخارلی اولسون طبعینیز و قلمینیز!
اسن قالین...

یاشار سه‌شنبه 4 تیر‌ماه سال 1392 ساعت 07:44 ب.ظ http://http://www.e-yayliq.blogfa.com/

فراخوان ششمین دوره جشنواره غیر‌دولتی «آنامین یایلیغی»
« شعر؛ و داستان کوتاه ترکی، ویژه بانوان»

مهسا عبدالعلی زاده چهارشنبه 8 خرداد‌ماه سال 1392 ساعت 02:17 ق.ظ http://mehsa1.blogfa.com

سلاملار
بیر شئعریله یئنی لندیم
بویورون[لبخند][گل]

برای نمایش آواتار خود در این وبلاگ در سایت Gravatar.com ثبت نام کنید. (راهنما)
ایمیل شما بعد از ثبت نمایش داده نخواهد شد