دیلک - حمید آرغیش

بو گون اوچونجو کره ایدی کی قیز اللرینی گؤیه قالدیریب آللاهینا یالواریردی:
«آللاهیم!!.. سئوگیلیم بو سون گونلر چوخ دیدرگین دیر.. اونون اوره‌یینی بیر زاد سیخیر.. اونون ایسته‌یینی اونا وئر.. گونلردیر سنه یالواریرام.. اونو ناراحات و کئفسیز گؤره‌نده منیم کئفیم قاچیر.. سن قادیر و باغیشلایانسان.. اونون دیله‌یینی اونا بخش ائت..!»
و هر گون قیز سئوگیلی‌سینین اوره‌یی‌نین شاد اولماغی اوچون تانرییا یالواریردی.. و نهایت تانری اونون ایسته‌یینی جاوابلاندیریر..
بیر گون قیز ماحال‌لاریندا اولان پارکدا سئوگیلیسنی گوللر کناریندا گؤرور.. گؤزلریندن سئوینج ساچیلیردی و دوداقلاریندا گولوش قونچالاری گول باغلامیشدی..
سئوگیلی‌سینین کناریندا باشقا بیر قیز دایانمیشدی..