X
تبلیغات
رایتل

گونئی آذربایجان حئکایه ادبیاتی

حمید آرغیش - ین حئکایه و مقاله‌لری

قارلی ارک - حمید آرغیش

هاوانین قارالتیسی چکیلمکده ایدی. قارین ایری دنه‌لری آغ اینجی‌لر تک اوینایا اوینایا آشاغی گلیردیلر. گاهدان آذر آیی‌نین او دونداریجی و یاخیجی یئلی اسیر، قاری هر یانا سپله‌ییردی.. یئل کوشولدویاراق، قبریستان کیمی اولان تبریزین ساکیت کوچه‌لرینده جؤولان ائدیردی. شهرین خیاوانلاریندا تکجه قارا چکمه‌لی و سیلاحلی ژاندارمالار بیرده سومسوک ایتلر گزینیردیلر.

دایانماق و سوسماق بیلمه‌ین یئلین کوشولتوسوندان «سالجان» گؤزلرین آچدی. اوتاغین بیر طرفینده‌کی چاتلاق شوشه‌لی لامپانین ایشیغی اطرافینا سوزوردو. اوتاغین دؤرد بوجاغی قارانلیق آلتیندا قالمیش، اورادا اولان ائو آراجلاری آیدین گؤرونموردولر. «سالجان» دریندن تؤوشه‌دی. اوتاغین سویوقلوغوندان آغزینین تؤوشه‌یینی گؤروردو. اؤزونه بوروموش میتیل یورقانی سینه‌سیندن یانا وئریب یئریندن بیر آز قالخدی. ائله او زامان قاپی اؤنوندن بیر آز آرالی «آیلا»نی انگینه سؤیکه‌نمیش حالدا گؤردو:

ـ آیلا؟!

سسینده شاشقینلیق و قورخو ایزی دویولوردو.

آیلانین اوزو لامپانین ایشیغیندا ساریلیق توتموش آداملار کیمی نظره گلیردی. آیلا یای قاشلی، اینجه بورونلو 9 -10 یاشلی قیز ایدی. ایری و قارا گؤزلری اوتاغین بیر بوجاغینا زیلله‌نه‌رک دونوق قالمیشدی. قارا ساچلارینین هؤرولموش اوجلاری قیچلاری اوسته آچیق اولان کیتابین اوستونه سریلمیشدی.

آیلانین دونوق دایانماسی و گؤزلرینین بیر یئره تیکیلی قالماسینی گؤره‌ن سالجان، داها قورخویا قاپانیب اوجادان اونو سسله‌دی:

ـ آیلا!.. قیزیم نه اولوب؟

آیلا قیرپینیب :

ـ آنا سن ده یاتماییب‌سان؟! ـ دئدی. سسینده دینجسیزلیک و راحاتسیزلیق دویولوردو.

ـ هوشلانمیشدیم.. قیزیم بو آغبر وضعیتده یاتاماق اولار؟

نئچه لحظه اوتاغین سوکوتو پوزولمادی.

بیردن آیلا بیر زاد دوشونموش یا تاپمیشلار کیمی اوجادان دئدی:

ـ آنا جان.! فیکر ائدیرسن آتام بو قاردا ـ بوراندا هارادادیر؟!

«سالجان» نئچه لحظه فیکره دالدی. سانکی اونون سوروسونا دیقتلی و دوغرو جاواب وئرمک ایسته‌ییردی..

ـ وآللاه نه بیلیم ـ دئدی. قورخما قیزیم هارادا اولسا یولداشلاریلا بیرگه دیر.. آللاه اؤزو یاردیمجی دیر.

ـ آمما بو تهراندان گلن ژاندارمالار..

ـ بونلار بیر ایش گؤره بیلمزلر.. سن ده آز فیکیر ائله..

هاوانین قارالتیسی بوسبوتون چکیلمکده ایدی. لامپانین ایشیغی گئت ـ گئده آزالیردی. نئچه لحظه ایدی سحرین ایشیغی تاختا چرچیوه‌لی پنجره‌دن ایچری سوزوردو.

آیلا آیاغا دوردو. کیتابی دووارداکی تاقچایا قویاندا، تاقچاداکی رسیم تابلوسو گؤزونه ساتاشدی. ستارخان تابلودان اونون گؤزلرینه باخیردی.

ـ گونده نه قده‌ر او ناخیشا باخیرسان؟!

آناسینین سسی ایدی.

ـ آخی آتامین تکجه چکیب بیترمیش تابلوسودور. «قارلی ارک» تابلوسودا یاریمچیق قالیب کی...

سونرا بیر آه چکه‌رک دئدی : آتا گؤر بو ژاندارمالار گلندن نه گونه دوشدوک!!

سالجان آیلانین فیکیرنی باشقا بیر یؤنه چاشدیرماق اوچون سوروشدو:

ـ اوشومورسن کی؟

آیلا سویوقدان آیاقلارینین کئی اولموش بارماقلارینی ترپتمه‌یه گوجنه‌رک آناسینا طرف دؤندو:

ـ آنا جان یوخ! ـ دئدی. بوگون اصلن اوشومورم.. قار یاغاندان هاوا بیر آز دوشوب..

سونرا آناسینا یاناشیب اونو قوجاقلایاراق:

ـ آخی آخشاما کوفته یئمیشم.. ـ دئییب گولومسه‌دی.

آناسی قیزی برک باغرینا باسدی. ـ آللاه «گولسون» خانیمی بلالاردان قوروسون.. ژاندارمالار ائویمیزی تالایاندان سونرا تکجه او آرواد دادیمیزا چاتدی.. آللاه اؤلن‌لرینه رحمت ائله‌سین.. ـ سالجان دئدی.

آیلا آناسینین باغرینداکن نئچه آن جانی قیزیشدی. سونرا سالجان کناریندا یاتمیش کیچیک اوغلونو اویاتماغا باشلادی.

ـ ستار .. دور .. آی بالا ستارخانیم.. دور بویان قوربان..

اوغلانجیغاز سویوقدان بوزوشموشدو. باشینی یورقانین آلتیندان بیر آز دیشاری چیخارتدی. آما یئنه تئز یورقانین التیندا گیزلندی.

ـ بو اوشاغا یازیغیم گلیر.. ایندی دن چتین‌لییه دوشوب.. آللاه باعثی‌نین ائوین داغیلتسین..

آیلا پنجره‌یه طرف گئدیب نئچه لحظه شوشه‌لری دونموش پنجره‌نین اؤنونده دایاندی..

ـ آناجان! گل.. گل ارک قالاسینا باخ.. هر یانینی قار بورویوب..

ـ قیزیم قار اریییب گئده‌ندیر.. بیزیم بو قارا گونلریمیز کیمی .. ارکدن ووقاری اؤیره‌نمه‌لی‌ییک..

نئچه لحظه ایدی کی، سالجان اوغلانجیغازی اویاتمیشدی. کیچیک اوشاغی باغرینا باسمیش و توکلرینی اوخشاییردی..

ـ آنا.. آنا.. ارکدن بیر نفری آسیبلار.. ـ آیلا باغیراراق آناسینا سسلندی.

ـ دونن ده نرگیزین اوغلونو گوللـه‌لدیلر.. ـ سالجان دئدی. ـ و سونرا دریندن آه چکه‌رک ـ یادیما سال آتان گلنده بو صحنه‌نی یاریمچیق قالمیش «قارلی ارک» تابلوسونا آرتیرمایی تاپیشیریم..

ـ گل!.. قیزیم گل اوتور بو اوشاغین یانیندا!.. گئدیم گولسوندن بیر آز یاغ آلیب گلیم.. کورسو آلیشسا ائو قیزار.. سیزه قلیان آلتی دا ساخلامیشام..

آیلا پنجره‌نین اؤنوندن کنارا چکیلدی. آناسینا طرف دؤنه‌رک:

ـ نه‌ییمیز وار کی؟ ـ دئیه سوردو.

ـ بوگون ده کوفته یئیه‌جه‌ییک.. ـ سالجان گولومسه‌دی.

ـ آنا یئنه گولسوندن می آلاجاقسان؟ ـ تعجبله سوروشدو.

ـ یوخ قیزیم!.. اونلارین دا وضع‌لری چوخ یاخشی دئییل.. آخشامدان قالیر..

ـ یانی؟ یانی سن آخشام بیر زاد یئمه‌دین؟!!

ـ قیزیم بالالی قارقا بال یئمز..

دریندن نفس آلدی. نئچه لحظه سوسقون دایاندی .

ـ آتان گلنده بیر شاققا ات آلیب کوفته پیشیره‌جه‌یم.. کوچه اهلینی ده چاغیراجایام.. عمی‌لرینی ده کنددن چاغیراجایام.. اوندا تایی آز گؤرونن بیر قوناقلیق دوزه‌نلیه‌جه‌یم.. او زامان دویونجا یئیه‌جه‌یم..

سالجان سوسدو. آیلانین قولاقلایندا آناسی‌نین سؤزلری بیر پینارین جوشماسی کیمی خوشا گلیم ایدی.

سالجان اوتاغین قاپیسینا طرف یورودو. آیلار 3 - 4 یاشلاریندا اولان اوشاغی قوجاغینا آلدی. اوشاغین آریق بده‌نی تیریییردی. آیلار اوشاغی برک باغرینا باساراق تاقچایا طرف دؤندو. سونرا الین اوزالدیب تاقچادان نئچه دقیقه اؤنجه قویدوغو «وطن دیلی» کیتابینی گؤتوردو.

***

آیلا کورسونون آلتینا داها چکیله‌رک

ـ آنا ایستی نه خوشدور.. ـ دئدی.

سالجان قاپی کناریندا اولان قارا گؤوده‌لی قاپلامانی گؤتوروب کورسویه طرف گله‌رک دئدی:

ـ بودا کوفته‌میز.. ها.. باخ هله.. کوفته دونوبدور.. داشا دؤنوب..

سالجان قاپلامانی تزه کورسونون اوستونه قویموشدو کی، قاپی شیدتله آچیلدی. آیدین ایدی کی بیری قاپینی بتردن تپیکله‌میشدی.. اوشاقلارین دوداقلارندا گولوش دونوق قالدی.. سالجانین گؤزلری قیرپیشیب یومروقلاری دویونله‌ندی.. قاپی آراسیندا هئیکل‌لی، قالین بیغلی، ائنلی کوروکلی و تولکو باخیشلی بیر ژاندارما دایانمیشدی. اونون دالیندا ایکی عسکر توفنگ الده امیر بکلمه‌ده ایدیلر. ژاندارمانین ساغ الی بؤیرونده‌کی تاپانچا اوسته ایدی. نئچه لحظه اوتاغین هریانینا گؤز دولاندیردی. نهایت گؤزلری سالجانین اوستونده تیکیلی قالدی.

ـ او کیتابهای درسینی وئرین ـ دئیه باغیردی. سسینده فارس لهجه‌سی واریدی.

آیلا کنارینداکی کیتابی کورسونون آلتینا سوخدو.

ـ بورا بیر فدایی‌نین «لانه‌»سی دیر. بورادا گره‌ک کیتاب چوخ اولسون.

سالجان بیر آددیم قاباغا قویوب ژاندارمانین اوزونه باغیردی:

داها نه ایستیرسیز؟!! ائویمیزی تالادیز.. کیشی‌میزی قاچاق سالدیز.. نه ایستیرسیز؟!!

عسکرلرین بیری باشچی‌نین قولاغینا نه‌سه پیچیلدادی دا ژاندارما:

ـ مژده وئر ـ دئدی. دونن متجاسر شوهرینی ژاندارمالار داغدا حرب حالیندا ووروبلار.. شاهیمیز بو خبرلردن مسرور اولور..!

سالجان یئرینده دوْندو. نئچه ‌لحظه سوسقونلوق هر یانی بورودو. اوشاقلار آنالارینا طرف دؤندولر.. سالجان نئچه لحظه کیریمیش حالدا قالدی. بیر آن یایدان قورتولموش اوخ کیمی ژاندارمانین اوزونه شیغادی. اونون اوزونو دیرناقلاری ایله جیردی:

ـ یالان دیر.. یالان...

ژاندارما بیر دربه ایله سالجانی کوروسون کنارینا توللادی. سالجان یئریندن قالخیب الینه گله‌نی ژاندارما طرف توللاییردی.

بیر قوروشقا ژاندارمانین هوندور باشی‌نین کناریندان کئچیب آرخاداکی عسکرلرین بیری‌نین بورنوندان توتدو. نئچه آن هر زاد کنترولدان چیخدی. قابلامانین قاپاغی قاپی‌نین چرچیوه‌سیندن توتدو.. بیرآن ژاندارما اؤزونه گلیب الینی بئلینده‌کی تاپانچایا طرف اپاردی. تاپانچانی چیخارتدی.. اوشاقلار کورسونون کنارینا میسدیلار..

بیردن بالاجا توپ یئکه‌لیگینده اولان شئی ژاندارمانین بوغازینا ده‌یدی. بیر بوغولتو خیریلتی سسی ده قالخدی.. بوغازینین سومویونو بیری اوودو سانکی...

تاپانچا بارماقلاری آراسیندان آشاغی دوشدو. آغیر گؤوده‌سی تاپانچانین آردیجا اوزو اوسته اوتاغین ایچینه طرف آشدی. عسکرلر ایکی آددیم گئری چکیلیب سیلاحلارین اوتاغین ایچینه توتدولار.

نئچه قورشون سالجانین کؤکسوندن ده‌یدی. کورسونون یانیندان دورب آناسینا طرف قاچماق ایسته‌ین آیلانی قورشون یئره تیکدی. آیلانین آل قانی کورسونون آلتیندا گیزیلی اولان «وطن دیلی» کیتابین اوستونه آخدی. آچیلان بیر قورشوندا باغری چارتلامیش ستارین کیچیک اوره‌ییندن ده‌یدی. آل قان اوتاغین کیلیم‌سیز ـ خالچاسیز تکین بویادی..

عسکرلر قورخا قورخا ایچری گیردیلر. باشچیلارینی قالدیرماق اوچون اونا طرف اییلدیلر.. ژاندارم نفس چکمیردی. باشی نورمال اولمایان بیر بیچیمده بیر یانا دؤنموشدو..

ژاندارمانین بوغازینا ده‌ین و اونون جانینی آلان زاد، هاوانین سویوقلوغوندان دونموش کوفته ایدی..

 

                                                                                    سون

                                                                                   

گؤنده‌رمه تارریخی: شنبه 1 مهر‌ماه سال 1391 ساعات 01:11 ق.ظ یازار: حمید | چاپ مطلب
نظرات (0)
برای نمایش آواتار خود در این وبلاگ در سایت Gravatar.com ثبت نام کنید. (راهنما)
نام :
پست الکترونیک :
وب/وبلاگ :
ایمیل شما بعد از ثبت نمایش داده نخواهد شد